لاہور (این این آئی ) صوبائی وزیر قانون رانا ثناء اللہ نے کہا ہے کہ میاں طاہر نے خود اپنے اوپر حملہ کروایا ، یہ شخص اس قابل نہیں کہ اسے جواب دیا جائے ۔حکمران جماعت کے رکن اسمبلی میاں طاہر کی طرف سے پنجاب اسمبلی میں اپنے اوپر لگائے گئے الزامات پر ردعمل ظاہر کرتے ہوئے رانا ثناء اللہ نے کہا کہ میاں طاہر کا فراڈ پہلے بھی سامنے آچکا ہے ۔ اس نے خود اپنے اوپر حملہ کروایا ۔ یہ شخص اس قابل نہیں کہ اسے جواب دیا جائے، عابد شیر علی یا ان کے والد الزامات لگائیں تو جواب دوں گا ۔ قبل ازیں میاں طاہر نے پنجاب اسمبلی میں الزام لگاتے ہوئے کہا تھا کہ مجھ پر چار جان لیوا حملے ہوچکے ہیں لیکن حکومت ابھی تک خاموش ہے ، ڈیڑھ سال قبل ہونیوالے حملے کے ملزمان نے رانا ثناء اللہ کا نام لیا ۔ آخری حملے کے ملزمان ابھی تک گرفتار نہیں ہوئے ، اگر مجھے یا میرے خاندان کو کچھ بھی ہوا تو اس کے ذمہ دار رانا ثناء اللہ ہوں گے ۔

موضوعات:!رانا ثناء اللہ عابدشیرعلی