لاہور(این این آئی )سنی اتحاد کونسل نے حکومت مخالف تحریک کا شیڈول تیار کر لیا ۔ یکم سے 30ستمبر تک ضلعی سطح پر احتجاجی جلسے ہونگے، چوکوں اور چوراہوں میں اذانیں د ی جائیں گی اور وزیر اعظم کو نااہل قرار دینے کے مطالبے پر مشتمل ہزاروں خطوط چیف الیکشن کمشنر اور چیف جسٹس پاکستان کو بھجوائے جائیں گے۔ احتجاجی تحریک کو منظم کرنے کیلئے مرکزی ، صوبائی ، ڈویثرنل اور ضلعی سطح پر کمیٹیاں قائم کردی گئی ہیں۔ اس بات کا فیصلہ جامعہ رضویہ میں سنی اتحاد کونسل کے کورکمیٹی کے منعقد ہونے والے اجلاس میں کیا گیا۔ اجلاس سے خطاب کرتے ہوئے سنی اتحاد کونسل پاکستان کے چیئرمین صاحبزادہ حامد رضا کا کہنا تھا کہ حکومت مخالف تحریک کامیاب بناکر دم لیں گے۔ حکومت کی الٹی گنتی شروع ہوچکی ہے۔ پارٹی آئین بدلنے تک فاروق ستار پر یقین مشکل ہے۔ وفاقی حکومت الطاف کے معاملے میں سیاسی مصلحتوں کا شکار ہے۔ حکمرا ن خاندان نے اپنی چوری بے نقاب ہونے کے ڈر سے پانامہ لیکس کی تحقیقات نہیں ہونے دیں۔ رینجرز کی کوششوں سے کراچی میں خوف کی حکمرانی ختم ہو رہی ہے۔ صاحبزادہ حامد رضا نے کہا کہ بھار ت کشمیر کا بدلہ لینے کیلئے کراچی کے حالات خراب کرنا چاہتا ہے۔ وزیر اعظم ملک دشمن الطاف کے خلاف زبان کیوں نہیں کھولتے۔ اپوزیشن متحد نہ ہو ئی تو قوم اسے معاف نہیں کرے گی۔ اجلاس میں مفتی محمد حسیب قادری، سید جوادالحسن کاظمی، مفتی وسیم رضا ، مولانا عبد الخالق نقشبندی،صاحبزادہ عمار سعید سلیمانی، ڈاکٹر مفتی محمد کریم خان، میاں فہیم اختر ، صاحبزادہ حسن رضا،پیر اظہر شاہ، ملک بخش الٰہی، مولانا اکبر نقشبندی، بیرسٹرصاحبزادہ حسین رضا ، الحاج سرفراز تارڑ،مفتی محمد رمضان جامی، ارشد مصطفائی نے شرکت کی۔