اسلام آباد (نیوز ڈیسک) قومی کرکٹر حسن علی اور ان کی اہلیہ سامعہ خان کے درمیان مبینہ اختلافات سے متعلق سوشل میڈیا پر جاری قیاس آرائیوں کے دوران سامعہ خان کی نئی پوسٹ سامنے آگئی۔
سامعہ خان نے اپنی سابقہ انسٹاگرام اسٹوری ہٹانے کے بعد حسن علی کے ساتھ ایک تصویر شیئر کی، جس میں دونوں ایک ساتھ ڈنر کرتے ہوئے خوشگوار انداز میں دکھائی دے رہے ہیں۔ نئی تصویر کو سوشل میڈیا پر گردش کرنے والی افواہوں کے جواب کے طور پر دیکھا جا رہا ہے۔
اپنی پوسٹ کے ساتھ سامعہ خان نے افواہیں پھیلانے والوں کو مخاطب کرتے ہوئے لکھا، ’’خاموش ہو جائیں اور اپنے ویوز کسی اور جگہ سے حاصل کریں۔‘‘
سامعہ کی یہ پوسٹ اس وقت سامنے آئی ہے جب ان کی گزشتہ انسٹاگرام اسٹوری کے بعد حسن علی کی مبینہ بے وفائی اور دونوں کے درمیان ازدواجی اختلافات سے متعلق مختلف قیاس آرائیاں شروع ہوگئی تھیں۔
گزشتہ اسٹوری میں سامعہ خان نے شادی شدہ اور بچوں کے والد مردوں کے ساتھ تعلقات قائم کرنے والی خواتین پر تنقید کی تھی۔ اس بیان کے بعد سوشل میڈیا صارفین نے اسے حسن علی کے ساتھ ان کی ذاتی زندگی سے جوڑتے ہوئے مختلف تبصرے اور قیاس آرائیاں شروع کردی تھیں۔
تاہم، حسن علی کے ساتھ نئی تصویر اور سامعہ خان کے حالیہ پیغام کے بعد بظاہر انہوں نے ان قیاس آرائیوں کو مسترد کرنے کی کوشش کی ہے۔
