اسلام آباد(مانیٹرنگ ڈیسک)آزاد کشمیر کے سابق وزیر اعظم وپی ٹی آئی کشمیر کے صدر بیرسٹر سلطان محمود چوہدری نے کہا ہے کہ دھاندلی اور دھونس کی پیداوار اسمبلی زیادہ دن نہیں چل سکے گی۔ یہ خود ہی جلد اپنے انجام کو پہنچ جائے گی کیونکہ نہ نواز شریف کا زیادہ دیر وزیر اعظم رہنے کا ریکارڈ ہے اور اب تین سال ہونے کو آئے ہیں اب ایسا لگتا ہے کہ انکا اقتدار جلد ہی ختم ہو جائے گا۔اسی طرح فاروق حیدر بھی پہلے 9 ماہ وزیر اعظم رہے اور وہ بھی زیادہ دیر تک وزیر اعظم نہیں رہیں گے۔ویسے بھی اب آزاد کشمیر کے عوام یہ جان چکے ہیں کہ موجودہ حکومت عوامی مینڈیٹ چرا کر اقتدار میں آئی ہے اور جس طرح ن لیگ اور پیپلز پارٹی کی ملی بھگت سامنے آئی اور ن لیگ نے پہلے خواتین کی مخصوص نشست کے لئے اپنے چار ووٹ پیپلز پارٹی کو دئیے اور بعد ازاں اسی طرح دیگر نوٹیفکیشن جاری کیے گئے۔ کینگروو اسمبلی بنوانے کے ساتھ ساتھ ن لیگ نے جو دیگر حرکتیں کی ہیں یہ ان کے دیوالیہ پن کی عکاسی کرتا ہے۔ان خیالات کا اظہار انھوں نے آج یہاں کھوئی رٹہ میں پی ٹی آئی کشمیر کے رہنماؤں اور کارکنوں سے خطاب کرتے ہوئے کیا۔
اس موقع پر صدارت نثار انصر ابدالی نے کی جبکہ تقریب سے پی ٹی آئی کشمیر کے چیف آرگنائزر چوہدری ظفر انور، سابق وزیر و پی ٹی آئی کشمیر کے سابق امیدوار اسمبلی چوہدری رفیق نیر ، چوہدری یوسف آف دھنہ، چوہدری جاوید شاہد ایڈووکیٹ اور دیگر مقررین نے بھی خطاب کیا۔بیرسٹر سلطان محمود چوہدری نے کہا کہ ن لیگ نے آزاد کشمیر کے حالیہ انتخابات میں دھاندلی کرکے عوامی مینڈیٹ چرایا ہے اور عوام اب جان چکے ہیں کہ یہ کینگروو اسمبلی ہے اور یہ زیادہ دیر نہیں چل سکے گی۔ اس سے قبل آزاد کشمیر کے سابق وزیر اعظم وپی ٹی آئی کشمیر کے صدر بیرسٹر سلطان محمود چوہدری نے کوٹلی میں کارکنوں سے خطاب کرتے ہوئے کہا کہ پی ٹی آئی کشمیر کے کارکنوں نے انتخابات زبردست طریقے سے لڑے لیکن دھاندلی کی باعث پی ٹی آئی کشمیر کو سازش کے تحت ہرایا گیا۔ جلد ہی ددھاندلی کے سارے ثبوت سامنے آجائیں گے تو اس کینگروو اسمبلی کی کوئی اہمیت نہیں رہے گی۔اس موقع پر سابق ممبر کشمیر کونسل چوہدری محبوب، حنیف ایڈووکیٹ۔ مظہر کاظمی، چوہدری ساجد ایڈووکیٹ آف جونا، چوہدری ظہیر عباس، انور شہزاد اور دیگر مقررین نے بھی خطاب کیا۔

موضوعات:نواز شریف