ملتان (آئی این پی)بھارتی آبی جارحیت اور بارشوں سے پیدا ہونے والی صورتحال کے سبب حکومت پنجاب نے ملتان سمیت صوبہ کے 11 شہروں میں فلڈ وارننگ جاری کردی۔ضلعی حکومتیں سیلاب سے بچاؤ کے انتظامات کریں،پنجاب حکومت نے ہدایات جاری کردیں۔پاکستان میٹریالوجیکل ڈیپارٹمنٹ نے بھی دریائے چناب میں اونچے درجے کے سیلاب کا خدشہ ظاہرکردیا۔ساڑھے3 لاکھ کیوسک کا سیلابی ریلا 3 روز میں ملتان پہنچے گا۔تفصیلات کے مطابق بھارت کی طرف سے دریائے چناب میں بغیر اطلاع کے پانی چھوڑے جانے اور بارشوں سے پیدا ہونے والی صورتحال کے سبب حکومت پنجاب نے ملتان سمیت صوبہ کے 11 شہروں میں فلڈ وارننگ جاری کردی۔ضلعی حکومتوں کو سیلاب سے بچاؤ کی ہدایات بھی جاری کی گئیں ہیں۔پاکستان میٹریالوجیکل ڈیپارٹمنٹ نے بھی دریائے چناب میں اونچے درجے کے سیلاب کی وارننگ جاری کردی ۔3سے ساڑھے 3لاکھ کیوسک کا سیلابی ریلا تین روز میں ملتان کے ہیڈمحمدوالا ودیگر حفاظتی بندوں سے ٹکرائے گا۔دوسری طرف ڈی سی او ملتان نادر چھٹہ نے ضلعی انتظامیہ کو ہدایات جاری کرتے ہوئے کہا کہ فوری مخصوص مقامات پر فلڈ ریلیف کیمپ لگائے جائیں اور لوگوں کو گھروں سے نکالا جائے۔ پولیس کی مدد سے بیٹ کے علاقوں سے عوام اور جانوروں کو نکالا جائے اور مساجد میں اعلانات بھی کرائے جائیں۔نادر چھٹہ نے آگاہ کیا کہ فی الحال نقصان کا خطرہ نہیں تاہم انتظامیہ ریڈ الرٹ ہے۔فلڈ ریلیف کیمپوں میں کھانے پینے سمیت تمام سہولتیں فراہم کی جائیں گی۔ڈی سی او ملتان نے بتایا کہ حفاظتی بندوں کی انسپکشن مکمل ہوچکی ہے،کشتیاں اور لائف جیکٹس سمیت ادویات کا وافر سٹاک موجود ہے۔