اسلام آباد (آئی این پی )عوامی نیشنل پارٹی کے مرکزی رہنما اور رکن قومی اسمبلی غلام احمد بلور نے کوئٹہ دھماکے کی مذمت کرتے ہوئے کہا ہے کہ جب تک بھارت ، افغانستان اور ایران سے تعلقات بہتر نہ کئے گئے دہشت گردی نہیں رکے گی، ہم نے افغانستان میں دہشت گردی کے لئے لوگوں کو تربیت دی ، وہ ردعمل کے طورپر ہمارے ملک میں کر رہے ہیں ۔ وہ پیر کو پارلیمنٹ ہاؤس کے باہر میڈیا سے گفتگو کر رہے تھے ۔ انہوں نے کہا کہ ہماری بدقسمتی ہے کہ تمام سیاسی جماعتوں کی مشاورت سے تیار کئے جانے والے نیشنل ایکشن پلان پر درست طریقے سے عمل درآمد نہیں ہو رہا، حکومت سے اس حوالے سے بازپرس ہونی چاہیے ۔ انہوں نے کہا یہ کہنا غلب ہے کہ دہشت گردوں کی کمرٹوٹ گئی ہے ، اگر کمر ٹوٹی ہوتی تو ایسے واقعات نہ ہوتے۔ غلام احمد بلور نے کہا کہ جب ہم افغانستان میں دہشت گردی کے لئے لوگوں کو تربیت دیں گے تو لازمی بات ہے کہ وہ بھی ردعمل کے طور پر پاکستان میں دہشت گردی کریں گے ، جب تک پڑوسی ممالک بھارت، افغانستان اور ایران سے تعلقات بہتر نہ ہوئے تب تک معاملات بہتر نہیں ہو سکتے، تمام ملکوں کو مذاکرات کے ذریعے مسائل کا حل ڈھونڈنا ہوگا، آپس کے اختلافات ختم نہ ہوئے تو امن وامان قائم نہیں ہوسکتا،واضح رہے کہ عوامی نیشنل پارٹی کے مرکزی رہنما غلام احمد بلور کو ئٹہ واقعہ سے لا علم نکلے ،صحافی کے سوال پر پہلے سانحہ کی تفصیلات لیں پھر مذمت کی ۔ تفصیلات کے مطابق پیر کو عوامی نیشنل پارٹی کے مرکزی رہنما غلام احمد بلور قومی اسمبلی کے اجلاس میں شرکت کے لئے پارلیمنٹ ہاؤس پہنچے تو ان سے ایک صحافی نے کوئٹہ سانحہ بارے دریافت کیا تاہم غلام احمد بلور سانحے سے لاعلم نکلے اور یہ کہہ کر سب کو حیران کردیا کہ انہیں اس سانحے کوئٹہ بارے کوئی علم نہیں ۔بعد ازاں میڈیا نمائندوں کی طرف سے انہیں کوئٹہ سانحے میں ہونے والی شہادتوں بارے بتایا گیا جس کے بعد انہوں نے بم دھماکے کی مذمت کی