لاہور (مانیٹر نگ ڈیسک ) وزیراعظم نواز شریف نے سول ہسپتال کوئٹہ میں دھماکے کی سخت مذمت کرتے ہوئے کہا ہے کہ بلوچستان میں عوام ، فورسز اور پولیس کی بے پناہ قربانیوں کے بعد امن بحال ہوا ہے ، کسی کو بلوچستان کا امن تباہ کرنے کی اجازت نہیں دیں گے۔ وزیراعظم نے حملے میں زخمی ہونے والوں کو علاج کی بہترین سہولیات فراہم کرنے کی ہدایت کی ہے۔وفاقی وزیرداخلہ چوہدری نثارعلی خان نے سول اسپتال کوئٹہ میں دھماکے کی سخت مذمت کرتے ہوئے انسانی جانوں کے ضیاع پر گہرے دکھ اور افسوس کا اظہار کیا ہے ۔سابق وزیر اعلیٰ بلوچستان عبدالمالک کہتے ہیں دہشت گرد پاکستان کو ترقی کرتے دیکھنا نہیں چاہتے ہیں ۔ بلوچستان اسمبلی میں اپوزیشن لیڈر مولانا عبدالواسع نے دھماکے کی مذمت کی اور لواحقین سے ہمدردی کا اظہار کیا ۔
عمران خان کا مذمت کرتے ہوئے کہنا ہے کہ دہشت گردوں کی سول ہسپتال میں کارروائی بزدلانہ عمل ہے ۔تحریک انصاف کے رہنما شاہ محمود قریشی نے بھی کوئٹہ دھماکے پر افسوس کا اظہار کیا ۔ ان کا کہنا تھا کہ دشمن بھی ہسپتالوں کو نشانہ نہیں بناتے ، دہشت گردی کے پیچھے وہ عناصر ہیں جو پاکستان کو مستحکم اور ترقی کرتا نہیں دیکھ سکتے ۔
آصف علی زرداری اوربلاول بھٹو نے کوئٹہ دھماکے کی مذمت کرتے ہوئے کہا معصوم لوگوں کواس طرح دہشت گردی کا نشانہ بنانے کی اجازت نہیں دی جا سکتی ۔ دہشت گردی کے اس ظلم کو روکنے کے لئے فیصلہ کن اقدامات کی ضرورت ہے ۔ پیپلزپارٹی عوام کی مدد سے دہشت گردوں کو شکست دے گی ۔ بلاول بھٹو نے بھی اس واقعہ کی مذمت کرتے ہوئے پارٹی کارکنوں کو ہدایت کی کہ وہ فوری طورپر دھماکے کے زخمیوں کے لئے خون کے عطیات دیں تاکہ ان کی قیمتی جانوں کو بچایا جاسکے۔ بلاول بھٹو زرداری کا مزید کہنا تھا پوری پاکستانی قوم قومی جذبے کے ساتھ دہشتگردی کو کچلنے کے لیے متحد ہے، دہشتگرد اپنے خلاف قوت جنگ کو کمزور کرنے کے لیے اسکولوں اور ہسپتالوں کو نشانہ بنا رہے ہیں ۔ سیاسی رہنماؤں نے اس عزم کا اظہار کیا ہے کہ دہشت گردوں کو ان کے مقصد میں کبھی کامیاب نہیں ہونے دیں گے ۔