لاہور ( این این آئی) نجی ائیر لائنز کی پرواز کو تاخیر سے پہنچنے پر دبئی میں لینڈنگ کی اجازت نہ مل سکی ، طیارے میں 170مسافر سوار تھے تاہم پرواز کو واپس بھیج دیا گیا ، لاہور پہنچنے پر مسافروں نے ائیرپورٹ پر شدید احتجاج کرتے ہوئے نعرے بازی کی ۔ بتایا گیا ہے کہ لاہور سے نجی ائیر لائن کا طیارہ 170مسافروں کو لے کر دبئی ائیر پورٹ پہنچا تو دبئی حکام نے آگاہ کیا کہ آپ شیڈول سے بہت تاخیر سے آئے ہیں جس کی بنا ء پر اب لینڈنگ کا وقت گزر چکا ہے اور واپس تشریف لے جائیں ۔جس پر طیارے نے واپس لاہور کا رخ کر لیا ۔ اس طر ح لاہور سے جانے والی پرواز دبئی میں لینڈنگ کے بغیر ہی واپس آگئی جس کے خلاف لاہور ایئرپورٹ پر مسافروں نے شدید احتجاج کرتے ہوئے دبئی انتظامیہ اور نجی ائیر لائنز کے خلاف نعرے بازی کی ۔ مسافروں کا کہنا ہے کہ دبئی ایئر پورٹ انتظامیہ نے طیارے کو پرواز بھرنے کے بعد دبئی میں لینڈکرنے سے منع کیا تھا تو کسی اور ایئر پورٹ پر طیارے کو اتارا جا سکتا تھا ۔طیارے کو واپس لاہور لانے کی وجہ سمجھ سے باہر ہے ۔مسافروں نے کہا کہ ہمیں ہماری منزل دبئی فوری پہنچایا جائے ۔ اکثر مسافروں کا یہ بھی کہنا ہے کہ انہیں دبئی سے بھی آگے سفر کرنا تھا اور ائرلائن کی سستی کے باعث ان کو شدید ذہنی اذیت سے گزرنا پڑ رہا ہے ۔