کراچی(این این آئی)ایف بی آر نے تین سال کے دوران ٹیکس ادا نہ کرنے والے افراد کی 56 لاکھ سے زائد کاروباری ٹرانزیکشن کا ریکارڈ حاصل کیا ۔ نان فائلرز کی جانب سے اس عرصے میں 5 لاکھ 88 ہزار سودے صرف جائیداد کے ہوئے۔ایف بی آر نے گذشتہ تین سال کے دوران 56 لاکھ 23 ہزار 306 نان فائلرز کے کاروباری لین دین کا ریکارڈ حاصل کر لیا ہے۔ اس عرصے میں نان فائلرز نے 20 لاکھ 90 ہزار بجلی کے کمرشل کنکشن حاصل کیے۔ جائیداد کی خرید و فروخت کے 5 لاکھ 88 ہزار سودے کیے۔ 2 لاکھ 71 ہزار گاڑیاں خریدیں اور 3 لاکھ سے زائد موبائل فونز کی خریداری بھی کی ۔ اس کے علاوہ 2 لاکھ 21 ہزار ایسے ڈاکٹرز، انجینئرز اور وکلا کا ریکارڈ بھی حاصل کیا جو ٹیکس ادا نہیں کرتے۔ ایف بی آر نے تین سال کے دوران 4 لاکھ 65 ہزار افراد کو نوٹسس جاری کیے گئے جس میں سے 2 لاکھ 34 ہزار افراد نے ٹیکس ریٹرن فائل کیا۔