لاہور(این این آئی )پنجاب ایمرجنسی سروس ریسکیو1122کے 6رکنی وفدنے سکاٹ لینڈ برطانیہ سے اورنج میٹرو لائنزکی ایمرجنسی اینڈڈزاسٹر تربیت مکمل کر لی اس تربیت سے ریسکیو1122 اور نج میٹرو لائنزپر رونما ہونے والے حادثات و سانحات سے بہتر طریقے سے نبرد آزما ہو سکیں گے۔وزیر اعلیٰ پنجاب میاں محمدشہبازشریف کی خصوصی ہدایات پرریسکیو1122کی ٹیم کوٹریننگ کیلئے سکاٹ لینڈ برطانیہ بھیجاگیا یہ انٹر نیشنل ٹریننگ حنظلہ ملک ممبر سکاٹش پارلیمنٹ کے تعاون سے ممکن ہوئی اور یہ تربیت گلاسگو اور لاہور سٹی کے مابین مفاہمت کی یاداشت کے تحت کروائی گئی۔ڈاکٹر احمد رضا(تمغہ امتیاز ) ڈسٹرکٹ ایمرجنسی آفیسر،لاہور سربراہ وفد نے ڈائریکٹرجنرل پنجاب ایمرجنسی سروس(ریسکیو1122) بریگیڈئیر(ر) ڈاکٹر ارشد ضیاء اورتمام ہیڈ کوارٹرزٹیم کو سکاٹش فائر سروس گلاسگو،سکاٹ لینڈ برطانیہ میں 10دن کی میٹروٹرین حادثات اور سانحات کی اکیڈمک، پریکٹیکل اور فرضی مشقوں کے ذریعے تربیت پر بر یفنگ دی۔ انہوں نے بتایاکہ پاکستان ریسکیو1122 ٹیم شاہد وحید قمرایمرجنسی آفیسر، محمد اعظم ریسکیو اینڈ سیفٹی آفیسر، نعیم الرحمن ایمرجنسی میڈیکل ٹیکنیشن ، امجد خان فائر ریسکیوراور جہانگیرڈرٹ ریسکیورپرمشتمل تھی۔ریسکیورز نے فیلڈوزٹ کے حوالے سے سکاٹش پبلک ٹرانسپورٹ سسٹم اور ایمبو لینس سسٹم کا دورہ بھی کیا۔ مزیدبراں ٹیم نے زیر زمین ساخت اور سرنگوں میں آپریشن، انسیڈنٹ کمانڈ کنسیڈیریشن ، خطرات کی تشخیص، خصوصی آلات کی تربیت، بڑے حادثہ/سانحہ سے نبرد آزما ہونے کی موثر منصوبہ بندی ، زیر زمین اسٹیشنز کے دورے، ٹریفک حادثات کو روکنے کی منصوبہ بندی، ہنگامی منصوبہ بندی، اسٹریٹیجک منصوبہ بندی کنٹرول روم اور پیرا میڈیکل پروگرام کے متعلق تربیت حاصل کی۔ڈائریکٹرجنرل بریگیڈئیر(ر) ڈاکٹر ارشد ضیاء نے ٹیم کو اورنج میٹرو لائنزکی ایمرجنسی اینڈڈزاسٹر تربیت کی کامیاب تکمیل پرمبارکباددی اورانہوں نے ہدایت کی کہ ماسٹرٹرینرزجلدازجلدتمام ریسکیورز کی جدید ٹریننگ کیلئے جامع تربیتی کورس ترتیب دیں۔ ڈی جی ریسکیو پنجاب نے کہا کہ ہم وزیر اعلیٰ پنجاب کے بے حد مشکور ہیں کہ انہوں نے حنظلہ ملک سکاٹش ممبر پارلیمنٹ کے باہمی رابطے سے ریسکیو1122کی استعداد کار بڑھانے کیلئے تمام تر معاونت فراہم کی۔