اسلام آباد (این این آئی) وفاقی وزیر داخلہ چودھری نثار علی خان نے وفاقی دارالحکومت میں پیشہ ور بھکاریوں کی موجودگی کی شکایت کا سخت نوٹس لیتے ہوئے پولیس سے جواب طلبی کرلی ہے۔ وزارت داخلہ کی جانب سے جاری بیان کے مطابق وفاقی وزیر داخلہ چودھری نثار علی خان نے وفاقی دارالحکومت میں پیشہ ور بھکاریوں کی موجودگی کی شکایت کا سخت نوٹس لیتے ہوئے پولیس سے جواب طلبی کرلی ہے۔ وفاقی وزیر داخلہ نے کہا ہے کہ پیشہ ور گداگر دیگر جرائم کے علاوہ دہشت گردی کی وارداتوں میں بھی ملوث ہو سکتے ہیں ، انہوں نے ہدایت کی کہ مستحق لوگوں کو متعلقہ فلاحی اداروں اور این جی اوز کے حوالے کیا جائے جبکہ پیشہ ور بھکاریوں کے خلاف سخت کاروائی کی جائے۔ انہوں نے کہا کہ آئندہ اس سلسلے میں کوتاہی پر ضلعی پولیس کے سربراہ سے جواب طلبی ہوگی۔