نئی دہلی(آئی این پی ) بھارت نے چین کی سرکاری خبر رساں ایجنسی شنہوا کے تین صحافیوں کو ملک سے نکل جانے کا حکم دے دیا اور ان کے ویزے کی تجدید سے انکار کردیا۔ہندوستان ٹائمز کی رپورٹ کے مطابق جن تین صحافیوں کو 31 جولائی تک ہندوستان سے نکل جانے کا حکم دیا گیا ہے ان میں شنہوا کے نئی دہلی اور ممبئی کے بیورو چیفس وو شیانگ اور لو تانگ بھی شامل ہیں جبکہ تیسرا صحافی شنہوا کے لیے رپورٹنگ کرتا ہے اور وہ ممبئی میں موجود ہے۔رپورٹ کے مطابق ان تینوں صحافیوں کو ملک سے نکالنے کے حوالے سے حکومت نے کوئی وجہ نہیں بتائی۔ہندوستانی حکومت کی جانب سے یہ فیصلہ ایک ایسے وقت میں سامنے آیا ہے جب نیوکلیئر سپلائرز گروپ (این ایس جی) میں بھارتکی شمولیت کے حوالے سے چین اور بھارتکے درمیان تعلقات پہلے ہی کشیدگی کا شکار ہیں۔چین نے گزشتہ ماہ ہونے والے این ایس جی کے اجلاس میں گروپ میں شمولیت کے حوالے سے بھارتیدرخواست کی حمایت سے انکار کردیا تھا۔
واضح رہے کہ کسی بھی ملک کے شہری کو ملک سے نکالنے کیلئے حکومتوں کی جانب سے اپنایا جانے والا سب سے آسان طریقہ ویزوں کی تجدید سے انکار ہوتا ہے۔شنہوا کے صحافی وو شیانگ گزشتہ 7 برس سے بھارت میں تعینات ہیں جبکہ دیگر دو صحافی ایک برس قبل ہی ممبئی آئے ہیں۔ تجزیہ کاروں نے خدشہ ظاہر کیا ہے کہ چین بھی بدلے کے طور پر بھارتیصحافیوں کو ملک بدر کرسکتا ہے۔واضح رہے کہ گزشتہ دنوں بھارتی فوج کی جانب سے چین کے ساتھ ’متنازع سرحد‘ کے قریب 100 ٹینک تعینات کیے جانے کے بعد دونوں ملکوں کے تعلقات متاثر ہونے کا خدشہ ظاہر کیا جارہا تھا۔این ایس جی کی رکنیت کے حوالے سے چین نے موقف اختیار کیا تھا کہ جب تک پاکستان کو این ایس جی کی رکنیت نہیں دی جاتی، اس وقت تک بھارت کو بھی اس گروپ میں شامل نہیں کیا جاسکتا۔