مظفر آباد (نیوز ڈیسک) آزاد جموں و کشمیر کی قانون ساز اسمبلی کے انتخابات میں حصہ لینے والی نمایاں جماعتوں میں پاکستان مسلم لیگ نواز، پیپلز پارٹی، تحریک انصاف، مسلم کانفرنس اور جماعت اسلامی شامل ہیں۔ ان جماعتوں کی جانب سے میدان میں اتارے گئے امیدواروں کے علاوہ متعدد آزاد امیدواروں نے بھی آزاد جموں و کشمیر کے انتخابات میں حصہ لیا۔اب تک موصول ہونے والے غیرحتمی غیرسرکاری نتائج کے مطابق، پاکستان مسلم لیگ ن 24نشستوں کے ساتھ سرفہرست ہے۔ مسلم کانفرنس 3 نشستوں کے ساتھ دوسرے نمبر پر ہے۔ پاکستان تحریک انصاف اور پیپلز پارٹی دو دو نشستوں کے ساتھ تیسرے نمبر پر ہیں جبکہ جموں و کشمیر پیپلز پارٹی ایک نشست حاصل کر سکی ہے۔ یاد رہے کہ پی پی پی اس وقت آزاد جموں و کشمیر کی حکمران جماعت ہے۔ دریں اثناء پی پی پی کا یہ پہلا الیکشن تھا جو اس نے اپنے نوعمر رہنماء بلاول بھٹو کی قیادت میں لڑا۔