اسلام آباد (مانیٹرنگ ڈیسک) وزیراعظم محمد نواز شریف کی ہدایت پر ترکی میں پاکستانی قونصل خانہ اور سفارتخانہ ترکی میں مقیم پاکستانی برداری کے اراکین سے مسلسل رابطہ میں ہیں جو بحفاظت ہیں۔ ترکی میں پاکستانی سفارتخانہ اور قونصلیٹ ترک ایئر لائن سے بھی مسلسل رابطہ میں ہیں تاکہ پھنسے ہوئے پاکستانیوں کی روانگی میں آسانی پیدا کی جاسکے۔ قبل ازیں وزیراعظم محمد نواز شریف کے معاون خصوصی برائے امور خارجہ کو ہدایت کی تھی کہ ترکی کے ہوائی اڈوں پر پاکستانیوں کی ہرممکن معاونت کو یقینی بنایا جائے۔
ترکی میں صورتحال کے باعث استنبول اور انقرہ سے ترکش ایئرلائن کی بڑی تعداد میں پروازیں منسوخ، ملتوی یا ری شیڈول کردی گئی تھیں۔ دفتر خارجہ کی طرف سے ہفتہ کو جاری پریس ریلیز میں کہا گیا ہے کہ ترکش ایئر لائن نے اب دوبارہ آپریشن شروع کردیا ہے اور پاکستانی سفارتخانہ اور قونصل خانہ کے دو افسران اتا ترک ایئرپورٹ پر تعینات کردیئے گئے ہیں جو وہاں پاکستانیوں کی مدد کر رہے ہیں۔ ترکی میں مدد کیلئے درج ذیل فون نمبرز استنبول کیلئے0090-532-568-3413 اور انقرہ کیلئے0090-505-979-5393 پر رابطہ کیا جاسکتا ہے۔ ایئر لائن کو بھی تجویز دی گئی ہے کہ اسے ٹرانزٹ لاؤنج میں ٹکٹ تبدیل کرنے چاہئیں۔ یہ نمبر صرف ایمرجنسی ہیلپ لائن کیلئے ترکی کے ہوائی اڈوں پر دوران سفر پاکستانیوں کی سہولت کیلئے ہیں دیگر افراد سے گذارش ہے کہ ان دو ٹیلی فون نمبروں کو غیرضروری کالز کے ذریعے مصروف نہ کریں۔