اسلام آباد(این این آئی) پاک فوج کوغیر آئینی اقدام پر اکسانے کے خلاف سپریم کورٹ میں آئینی درخواست دائر کردی گئی۔نجی ٹی وی کے مطابق سپریم کورٹ میں پاکستان فیڈرل یونین آف جرنلسٹ کے سابق صدر افضل بٹ نے وکیل اکرام چوہدری کے توسط سے پاک فوج کو غیرآئینی اقدام پراکسانے کے خلاف آئینی درخواست دائرکرادی۔ درخواست میں سربراہ پاک فوج جنرل راحیل شریف سے متعلق اسلام آباد میں بینرز لگانے والی تنظیم موو آن کے سربراہ، عوامی مسلم لیگ کے سربراہ شیخ رشید احمد، ٹی وی اینکر ڈاکٹر دانش اور حکومت کو فریق بنایا گیا ہے ٗدرخواست گزارنے موقف اختیارکیا کہ فوج نے اقتدار میں نہ آنے کا حلف اٹھا رکھا ہے، پاک فوج کے سربراہ کو حکومت کا تختہ الٹنے پر اکسانا آئین سے غداری کے مترادف ہے جب کہ فوج کوغیرآئینی اقدام پراکسانے والے محب وطن نہیں ہیں۔ درخواست گزار نے استدعا کرتے ہوئے کہا کہ عدالت فریقین کے خلاف آرٹیکل 6 کے تحت کارروائی کا حکم دے۔