اسلام آباد (این این آئی)آل پاکستان مسلم لیگ کے سیکرٹری جنرل ڈاکٹر محمد امجد نے کہا ہے کہ عوام کی طرف سے پاک فوج کو اقتدار سنبھالنے کی دعوت سے صاف ظاہر ہوتا ہے کہ حکومت عوام کو ریلیف نہیں دے سکی۔عوام کا اعتماد سیاسی حکمرانوں کی بجائے پاک فوج پر ہے۔جب حکمران عیاشیوں اور افواج ملک کی خدمت میں مصروف ہوں تو یہی نتیجہ نکلتا ہے۔عوام باشعور ہیں اور آزاد میڈیا کی بدولت سب دیکھ رہے ہیں۔حکمرانوں نے اب بھی اپنی روش نہ بدلی تو حالات کی تبدیلی کے ذمہ دار خود ہوں گے۔ان خیالات کا اظہار انہوں نے منگل کو پارٹی کے مرکزی شعبہ اطلاعات سے گفتگو کرتے ہوئے کیا۔انہوں نے کہا کہ سوشل میڈیا اور ملک کی اہم شاہراؤں پر افواج پاکستان کو اقتدار سنبھالنے کی دعوت بلا سبب نہیں ہے بلکہ اس کے پیچھے نام نہادجمہوریت کا راگ الاپنے والے نااہل حکمرانوں کی غیردانشمندانہ پالیسیاں ہیں۔عوامی ردعمل سے صاف ظاہر ہوتا ہے کہ عوام موجودہ حکمرانوں سے تنگ ہیں اور انہیں ملکی سلامتی اور وقار کیلئے کئے گئے اقدامات کی وجہ سے افواج پاکستان پر اعتماد ہے۔یہ بات حکمرانوں کیلئے باعث شرمندگی ہونی چاہئے اور انہیں چاہئے کہ نوشتہ دیوار دیکھ کر اپنی روش بدلیں مگر وہ اسے اپنے خلاف سازش قراردے رہے ہیں۔انہوں نے کہا کہ حکمران اپنی ذمہ داریاں ادا نہیں کرتے اور ان کے کرنے والے کام بھی افواج پاکستان کررہی ہیں۔یہ ساری صورتحال عوام کے سامنے ہے۔آزاد میڈیا کی بدولت عوام حقائق سے بخوبی واقف ہیں۔ اس لئے اب عوام کے دلوں میں جگہ بنانے کیلئے حکمرانوں کو عملی اقدامات کرنا ہوں گے۔