لاہور(آئی این پی) پیپلزپارٹی کے رہنما اور سینیٹ میں قائد حزب اختلا ف سینیٹر چوہدری اعتزاز احسن نے کہا ہے کہ ٹی او آرز کے معاملے میں (ن) لیگ کی من مانی قبو ل نہیں کر یں گے ‘اپوزیشن متحد ہے حکمران احتساب کے نام سے بھی ڈرنے لگے ہیں ‘حکمرانوں کیلئے بہتر یہی ہوگا وہ پانامہ لیکس کا حساب دیں ورنہ اپوزیشن کا سڑکوں پر سامنا کر نے کیلئے تیار رہے ‘بات بات پر جھوٹ بولنا (ن ) لیگ والوں کی عادت بن چکی ہے جو انکو ختم کر نا ہوگی ‘پیپلزپارٹی اپوزیشن کیساتھ اور اپنے موقف پر قائم ہے ۔ اتوار کو اپنے ایک ٹی وی انٹر ویو میں چوہدری اعتزاز احسن نے کہا کہ (ن) لیگ حکومت پانامہ لیکس کے ٹی اوآرز کے معاملے پر ڈنگ ٹپاؤ پا لیسی اختیار کر نا چاہتی ہے جو اپوزیشن کو کسی صورت قبول نہیں اگر پانامہ لیکس کمیٹی میں ٹی اوآرز کے معاملے پر حکمران من مانی کر یں گے تو یہ معاملہ کبھی حل نہیں ہوگا ۔ ایک سوال کے جواب میں چوہدری اعتزاز احسن نے کہا کہ (ن) لیگ نوازشر یف کے خاندان کو احتساب سے بچانا چاہتی ہے جو کسی بھی صورت ممکن نہیں احتساب کا آغاز سب سے پہلے نوازشر یف کے خاندان سے ہی ہوگا اس حوالے سے اپوزیشن کی تما م جماعتیں اپنے موقف پر قائم ہیں اور کسی بھی صورت اس سے پیچھے نہیں ہٹیں گی ۔ انہوں نے کہا کہ مجھے سمجھ نہیں آتی جب نوازشر یف اور انکے خاندان کا دامن صاف ہے تو احتساب سے خوفزدہ کیوں ہیں ؟جب یہ احتساب کے نام سے بھی ڈریں گے تو یہ بات ثابت ہو رہی ہے دال میں کچھ کالا نہیں بلکہ ساری دال ہی کالی ہے ۔