لاہور(مانیٹرنگ ڈیسک)صوبائی وزیر قانون و پارلیمانی امور رانا ثنا اللہ خان نے کہا ہے کہ عمران خان رمضان المبارک میں شوکت خانم کے نام پر اکٹھے کئے گئے چندے کو جلسے جلوسوں اور دھرنوں پر خرچ کرنے کیلئے بیتاب ہیں،عمران خان کی سیاست میں اپنی کوئی سوچ اور سمت نہیں ،وزیر اعظم نواز شریف ملک کی ترقی کی خاطر سب کو ساتھ لے کر چلنا چاہتے ہیں ۔ ایک انٹر ویو میں رانا ثنا اللہ خان نے کہا کہ عمران خان ایدھی فاؤنڈیشن کے بانی عبد الستار ایدھی کو اپنا رول ماڈل قرار دیتے ہیں لیکن بد قسمتی سے ان جیسی کوئی مثال قائم کرنے کو تیار نہیں۔ عمران خان رمضان المبارک میں شوکت خانم کے نام پر اکٹھے کئے گئے چندے کے پیسے کو جلسے جلوسوں اور دھرنوں پر خرچ کرنے کیلئے بیتاب ہیں جو غریبوں سے ظلم اور نا انصافی ہے ۔
انہوں نے کہا کہ عمران خان کیوں ملک و قوم کی ترقی کے درپے ہیں ، ملک و قوم کی ترقی کی راہ میں رکاوٹیں ڈال کر عمران خان صرف اپنی تسکین کا سامان کر رہے ہیں۔ انہوں نے کہا کہ عمران خان کے بعد ڈاکٹر طاہر القادری کی روانگی کی اطلاعات یقیناًلندن پلان IIہی ہو سکتا ہے اور اب واضح ہو گیا ہے کہ عمران خان اپنی کوئی سوچ نہیں رکھتے ۔انہوں نے کہا کہ 2018ء زیادہ دور نہیں ،پی ٹی آئی کے پاس وقت ہے کہ اب بھی اپنی سیاست کی سمت کا تعین کرے اور خیبر پختوانخواہ جہاں عوام نے انہیں ووٹ دے ہی دئیے ہیں وہاں کی عوام کی خدمت کریں ۔