کراچی ( مانیٹرنگ ڈیسک)محسن انسانیت عبدالستار ایدھی کا انتقال‘ ہر شخص سوگوار‘عظیم انسان عبد الستار ایدھی کی وفات کے باوجود ایدھی فاؤنڈیشن کے قابل تحسین اقدام نے سب کو حیران کر دیا۔ عبد الستار ایدھی کی وصیت کے مطابق ان کی وفات کے باوجود ملک بھر میں خدمت انسانیت کی تمام سرگرمیوں کو جوں کا توں جاری رکھا گیا۔فاؤنڈیشن کے سربراہ کے انتقال پر بھی ایدھی فاؤنڈیشن کی جانب سے خدمات کا صلہ جاری رکھا گیا۔ کراچی کے قدیم ترین علاقے کھارادر کے ایدھی فاؤنڈیشن ٹرسٹ کے کنٹرول روم میں کام ایک لمحے کیلئے نہیں رکا بلکہ جہاں جہاں سے ایمرجنسی کال آئی وہاں وہاں ایمبولینسوں نے خدمات فراہم کیں۔
فیصل ایدھی کا اس موقع پر کہنا تھا کہ 20زندگیاں بھی مل جائیں تو اپنے والد جیسا نہیں بن سکتا البتہ ان کے والد کا دکھی انسانیت کی خدمت کا مشن جاری رہے گا۔اگرچہ فاؤنڈیشن کے سربراہ کی تدفین کا عمل جاری تھا تاہم پھر بھی فیصل ایدھی کی جانب سے ملک بھر میں ایدھی سروسز جاری رکھنے کی ہدایات کی گئیں۔عوامی سطح پر ایدھی فاؤنڈیشن کے اس اقدام کو سراہا گیا ہے۔ عبد الستار ایدھی خود تو دنیا سے رخصت ہو گئے لیکن کروڑوں لوگوں کیلئے دوسروں کی خدمت کی بے شمار مثالیں چھوڑ گئے۔