اسلام آباد(مانیٹرنگ ڈیسک) صدی کے عظیم ترین انسان عبد الستار ایدھی کے آخری الفاظ بھی ان کی خدمت انسانیت کے جذبے کو عیاں کرتے ہیں۔ عبد الستار ایدھی گزشتہ شب 11 بجے کے قریب خالق حقیقی سے جا ملے تھے اور اپنے انتقال سے قبل جو الفاظ انہوں نے کہے وہ سن کر درد دل رکھنے والا ہر انسان اشکبار ہو گیا۔ تفصیل کے مطابق عالمی شہرت یافتہ سماجی کارکن عبد الستار ایدھی نے بستر مرگ پر وفات سے قبل اہلخانہ کو مخاطب کرتے ہوئے کہا تھا کہ ’’میرے ملک کے غریبوں کا خیال رکھنا‘‘ ۔
عبد الستار ایدھی نے دنیا سے رخصت ہوتے وقت بھی خدمت انسانیت کے جذبے کو نہیں چھوڑا اور جاتے جاتے اپنے اعضاء عطیہ کرنے کی وصیت کر گئے۔عبد الستار ایدھی نے اپنے صاحبزادے فیصل ایدھی کو مخاطب کرتے ہوئے کہا کہ میرے جانے کے بعد آپ نے ایدھی فاؤنڈیشن کو چلانا ہے اور غریب، مسکین و یتیم لوگوں کی خدمت میں کوئی کسر اٹھا نہ رکھنی ہے۔ عبد الستار نے ایدھی نے کہا وفات سے قبل کہا تھا کہ مجھے یقین ہے کہ فیصل ایدھی میرے بعد ایدھی فاؤنڈیشن چلائیں گے اور یہی میری وصیت ہے۔