اسلام آباد (مانیٹرنگ ڈیسک)مسجد نیوی ﷺ کے قریب دہشت گردی ۔ اسلامی دنیا میں غم وغصہ کی شدید لہر دوڑ گئی۔پاکستانی عوام میں بھی مسجد نبوی ﷺ پر دہشتگردانہ فعل کی وجہ سے شدید غم و غصہ کی لہر دوڑ گئی البتہ مسجد نبوی ﷺ میں ہونے والی دہشت گردی اہل اسلام کا جذبہ ایمانی اور جوش و خروش کم نہ کر سکی۔تفصیل کے مطابق دھماکوں کے باوجود لوگوں کی بڑی تعداد مسجد نبویﷺاور مسجد الحرام میں عبادت میں مصروف رہی ، نماز تراویح بھی ادا کی جبکہ نمازفجرمیں لاکھوں کی تعداد میں زائرین نے شرکت کی۔
اطلاعات کے مطابق لاکھوں زائرین رات بھر روضہ رسولﷺ کے گرد گھیرا بنائے بیٹھے رہے۔ دہشتگردی بھی اہل ایمان کا جوش و خروش کم نہ کر سکی۔ دہشتگردوں کے مسلمانوں کو خوف زدہ کرنے کے عزائم خاک میں مل گئے۔دھماکوں کے باوجود مسجد نبویﷺ میں عبادات کا سلسلہ جاری رہا۔ رمضان المبارک کے مقدس مہینے میں اہل اسلام کا جم غفیر اللہ کے حضور سربسجود ہونے کیلئے جوق در جوق پہنچ گیا۔ ماہ مبارک کے آخری عشرے میں دعاؤں کا سلسلہ بھی جاری ہے۔ لوگ نوافل کی ادائیگی ذکر و اذکار میں مشغول رہے۔ مسجد نبویﷺ میں نماز تراویح میں بھی لوگوں کی کثیر تعداد نے شرکت کرکے دشمن کو واضح پیغام دیا کہ وہ اہل ایمان کے جذبے کو کسی صورت کمزور نہیں کرسکتے اور روضہ رسول ﷺ کے دفاع کیلئے اپنی جانیں قربان کرنے سے بھی دریغ نہیں کریں گے۔