اسلام آباد(آئی این پی )پیپلز پارٹی اور مسلم لیگ (ن) میں کشیدگی بڑھ گئی ، دونوں جماعتوں کے رہنما ؤں کے درمیان سیاسی بیان بازی اور الفاظ کی جنگ شروع ،ایک دوسرے پر تنقید اور ایک دوسرے کی کرپشن بے نقاب کرنے کے لئے کھل کر میدان میں آگئیں ، وزیرداخلہ چوہدری نثار علی خان اور وزیراعلیٰ پنجاب شہباز شریف نے پیپلز پارٹی کے خلاف سخت موقف اپنانے اور ان کے دور حکومت میں کی گئی کرپشن کو بے نقاب کرنے کا فیصلہ کیا ہے جبکہ پیپلز پارٹی کے چیئرمین بلاول بھٹو زرداری نے پنجاب حکومت کی کمزوریوں ، وزیراعلیٰ شہبازشریف اور وزیرداخلہ کے خلاف بیان بازی کے لئے پارٹی رہنماؤں کو ٹاسک سونپ دیا ہے۔ تفصیلات کے مطابق پیپلز پارٹی کے چیئرمین بلاول بھٹو زرداری کی طرف سے مسلم لیگ (ن) اور بالخصوص وزیراعظم نوازشریف کو مسلسل تنقید کا نشانہ بنانے اور ان سے استعفیٰ مانگنے کے بیانات کے بعد وزیراعلیٰٰ پنجاب شہباز شریف اور وزیرداخلہ چوہدری نثار علی خان نے پیپلز پارٹی کی تنقید کا بھر پور جواب دینے کا فیصلہ کیا ہے اور دونوں رہنما پیپلز پارٹی کے دور حکومت میں ہونے والی کرپشن کو بھی بے نقاب کرنے پر متفق ہیں۔ مسلم لیگ (ن) ایک دھڑا پیپلز پارٹی کے ساتھ نرم گوشہ اختیار کئے ہوئے ہے تاہم وزیراعلیٰ پنجاب اور وزیرداخلہ پیپلزپارٹی کو خوب آڑے ہاتھوں لے رہے ہیں۔ ذرائع کے مطابق پیپلز پارٹی کے چیئرمین بلاول بھٹو زرداری نے وزیراعلیٰ پنجاب شہباز شریف اور وزیرداخلہ چوہدری نثار پر تنقید اور ان کے خلاف بیان بازی کے لئے پیپلز پارٹی کے رہنما?ں پر ایک گروپ تشکیل دیا ہے جن کویہ ذمہ داری سونپی گئی ہے کہ وہ مسلم لیگ (ن) کے خلاف سخت تنقید کریں۔