کارڈف(این این آئی) بنگلہ دیش میں داعش کے حملے میں 20 غیرملکیوں کی موت کے بعد انگلینڈ کا دورہ بنگلہ دیش منسوخ ہونے کا امکان ہے اور انگلش کرکٹ بورڈ اس بارے میں جلد متفقہ فیصلے سے بنگلہ دیشی بورڈ کو آگاہ کر دے گا۔بنگلہ دیش کے سفارتی علاقے میں واقع مشہور ریسٹورنٹ پر حملے میں دہشت گردوں نے یرغمال بنائے گئے 20 غیر ملکیوں کو تیز دھار آلے کی مدد سے ہلاک کردیا۔عید کی چھٹیوں سے قبل کیے گئے اس حملے کی ذمے داری دہت گرد تنظیم داعش نے قبول کر لی تھی۔انگلینڈ کو دو ٹیسٹ اور تین ایک روزہ میچوں کی سیریز کیلئے 30 ستمبر کو بنگلہ دیش پہنچنا ہے تاہم اس حملے کے بعد یہ دورہ کھٹائی میں پڑتا نظر آنے لگا انگلینڈ اینڈ ویلز کرکٹ بورڈ کے ترجمان نے واضح کیا کہ اگر برطانوی حکومت یا بنگلہ دیشی حکام کو صورتحال غیرمحفوظ نظر آئی تو ہم دورہ منسوخ کرنے کیلئے تیار ہیں۔ترجمان نے کہا کہ کھلاڑیوں اور مینجمنٹ کی حفاظت ای سی بی کیلئے ہمیشہ سے بہت اہمیت کی حامل رہی ہے اور اس کا اطلاق تمام غیرملکی دوروں پر ہوتا ہے۔انہوں نے کہا کہ اگر متعلقہ حکام نے ہمیں کہا کہ ماحول محفوظ نہیں یا بہتر اقدامات نہیں کیے گئے تو پھر ہم مناسب اقدامات کریں گے۔