لاہور (این این آئی ) قائمقام صدر مملکت و اسپیکر قومی اسمبلی سردار ایاز صادق نے کہا ہے کہ وزیر اعظم کااحتساب کسی کی مرضی کے مطابق نہیں بلکہ قانون کے مطابق کیاجائے گا، احتساب کا قانون بنے گا تو وہ صرف وزیر اعظم کے احتساب کیلئے نہیں بلکہ سبھی کے احتساب کیلئے بنے گا، شیخ صاحب کتنے سالوں سے اس حکومت کے جانے کی تاریخیں دے رہے ہیں ، اب اپنی شادی کی تاریخ بھی دے دیں ۔ان خیالات کا اظہار انہوں نے مقامی شادی ہال میں چیئرمین مردان زیدی کی جانب سے دئیے گئے افطار ڈنر کے موقع پر میڈیا سے گفتگو کے دوران کیا ۔ سردارایاز صادق نے کہا کہ سڑکوں پر آنے سے مسائل حل ہوتے تو پہلے بھی حل ہو جاتے ، پانامہ لیکس کا مسئلہ پارلیمنٹ میں ہی حل ہوگا،کسی بھی مسئلے کے حل کیلئے الیکشن کمیشن آف پاکستان موجود ہے اور عدالتیں بھی مو جود ہیں ۔ پاکستان موجودہ حالات میں دھرنوں کا متحمل نہیں ہوسکتا۔دھرنے دینے والے دھرنے دے کر پاکستان کا نہیں بلکہ پاکستان کے دشمنوں کا ایجنڈا پروان چڑھا رہے ہیں ۔ ان کی اس انتشار کی سیاست کی وجہ سے ہی چین کی سرمایہ کاری واپس جائے گی ۔ انہوں نے کہا کہ وزیر اعظم پانامہ لیکس سے ہرگز خوفزدہ نہیں ہیں ، انہوں نے قومی اسمبلی سمیت ہر فورم پر خود کو احتساب کیلئے پیش کیا ،وزیر اعظم کااحتساب کسی کی مرضی کے مطابق نہیں بلکہ قانون کے مطابق کیاجائے گا،وزیر اعظم کا نام تو پانامہ لیکس کی فہرست میں ہے ہی نہیں ، جب قانون بنے گا تو وہ صرف وزیر اعظم کے احتساب کیلئے نہیں بلکہ سبھی کے احتساب کیلئے بنے گا۔ اس میں آف شور کمپنیوں والے بھی آئیں گے ، قرضے معاف کروانے والے بھی آئیں گے ۔ ٹی اوآرز میں احتساب کیلئے صرف وزیر اعظم کانام نہیں لکھاجائے گا بلکہ احتساب کا قانون سبھی کیلئے بنے گا۔ ایک سوال کے جواب میں سردار ایاز صادق نے کہا کہ شیخ صاحب کتنے سالوں سے اس حکومت کے جانے کی تاریخیں دے رہے ہیں اب اپنی شادی کی تاریخ بھی دے دیں ۔