کراچی(نیوز ڈیسک) اے ٹی ایم کے ذریعے نجی بینک سے خفیہ ڈیٹا چرانے کے الزام میں وفاقی تحقیقاتی ایجنسی ( ایف آئی اے) نے ایک چینی شہری کو حراست میں لے لیا۔اس شخص پر الزام ہے کہ اس نے ایک نجی بینک کے اے ٹی ایم میں ڈیوائسز کے ذریعے صارفین کے خفیہ ڈیٹا کو چرانے کی کوشش کی۔تفصیلات کے مطابق ذرائع کا کہنا ہے کہ بینک انتظامیہ نے اپنے پلازہ برانچ کے اے ٹی ایم کمپاؤنڈ میں دو غیر ملکیوں کی مشکوک سرگرمیوں کو دیکھنے کے بعد ایف آئی اے سے رابطہ کیا جس کے بعد گرفتاری عمل میں آئی۔بینک انتظامیہ نے سی سی ٹی وی کیمرے کی ریکارڈنگ دیکھ کر یہ نوٹس کیا کہ دو غیر ملکی افراد معمول سے زیادہ دیر تک اے ٹی ایم کے اندر موجود ہیں جس کے بعد انہیں ان پر شک ہوا۔ذرائع نے گرفتاری کے بعد ایف آئی اے کے دستاویز کا حوالہ دیتے ہوئے بتایا کہ مشکوک سرگرمی 20 جون کو دیکھی گئی تھی، 21 جون کو بینک انتظامیہ اپنے تکنیکی عملے کے ساتھ مذکورہ برانچ کے اے ٹی ایم میں گئی اور ساتھ ہی ایف آئی اے کے سائبر کرائم سیل کو بھی اطلاع کردی۔سی سی ٹی وی فوٹیج میں ان غیر ملکیوں کو اے ٹیم ایم کے قریب بعض آلات چھپاتے ہوئے بھی دیکھا گیا جس کے بعد انتظامیہ حرکت میں آگئی اور ایف آئی اے کے ذریعے گرفتاری عمل میں آئی۔