اسلام آباد (مانیٹرنگ ڈیسک) آزاد کشمیر کے 21جولائی کو ہونے والے عام انتخابات میں مسلم لیگ (ن) اور جے کے پی پی کے درمیان انتخابی اتحاد فائنل ہو گیا، جے کے پی پی کے صدر سردار خالد ابراہیم خان ہفتہ کو نیشنل پریس کلب اسلام آبادمیں اتحاد کاباضابطہ اعلان کریں گے، واضح رہے کہ جے کے پی پی اور(ن) لیگ کے درمیان اتحاد کا فیصلہ وزیراعظم نواز شریف کے معاون خصوصی ڈاکٹر آصف کرمانی کی طرف سے سردار خالد ابراہیم کے ساتھ ہونے والی ملاقات میں کرلیا گیا تھا
جس میں آصف کرمانی نے خالد ابراہیم کو نواز شریف کا خصوصی پیغام پہنچایا تھا، اتحاد کا فارمولہ طے کرنے کیلئے دونوں پارٹیوں کی ایک چھ رکنی پارٹی تشکیل دی تھی جس نے معاملات فائنل کرلئے ہیں،(ن) لیگ نے اپنے انتخابی ٹکٹوں کی تقسیم کے وقت راولاکوٹ اور تھوراڑ کے دو حلقے جے کے پی پی کیلئے خالی رکھے تھے، تاہم مخصوص نشست پر معاملات طے کرنے کیلئے کافی بارگینگ ہوئی۔ ذرائع کے مطابق بالاخر طے پایا ہے کہ جے کے پی پی پی کو ایک مخصوص نشست بھی دی جائے گی، امکان ہے کہ جے کے پی پی کی نبیلہ ارشاد (ن) لیگ کے نجیب نقی کے حق میں دستبردار ہو جائیں گی، انہیں خواتین کی مخصوص نشست پر منتخب کرایا جائے گا۔