لاہور (نیوزڈیسک) لاہور ہائیکورٹ نے مسلم لیگ (ن) کے رکن قومی اسمبلی میاں جاوید لطیف کی نااہلی کیلئے الیکشن کمیشن میں جاری کارروائی روکنے کی درخواست پر فیصلہ محفوظ کر لیا۔گزشتہ روز لاہور ہائیکورٹ کے جسٹس خالد محمود خان نے کیس کی سماعت کی۔رکن قومی اسمبلی میاں جاوید لطیف کے وکیل نے عدالت کو بتایا کہ حلقے کے ووٹرز نے میاں جاوید لطیف کی نااہلی کے لئے الیکشن کمیشن میں بے بنیاد درخواست دائر کر رکھی ہے۔انہوں نے کہا کہ غیر ضروری درخواست پر الیکشن کمیشن نے کاروائی شروع کر رکھی ہے لہٰذاعدالت اس کاروائی کو روکتے ہوئے درخواست مسترد کرنے کے احکامات صادر کرے۔حلقے کے ووٹر افضل ورک نے کہا کہ میاں جاوید لطیف کی گریجوایشن کی ڈگری جعلی ہے،وہ آئین کے آرٹیکل 62اور 63کے معیار پر پورا نہیں اترتے لہٰذانااہلی کی درخواست پر کاروائی نہ روکی جائے ۔ جس پر عدالت نے فریقین کے وکلاء کے دلائل سننے کے بعد فیصلہ محفوظ کر لیا۔