لاہور ( نیوزڈیسک) شاعرِ مشرق علامہ محمد اقبال کی پہلی رہائش دریافت۔گورنمنٹ کالج (یونیورسٹی) لاہور کے بورڈنگ ہاﺅس کا وہ کمرہ جہاں علامہ اقبال نے 1895ءسے 1900ءتک اپنے زمانہ طالبعلمی کے یاد گار لمحات گزارے آج بھی اپنی اصل حالت میں محفوظ ۔وائس چانسلر پروفیسر ڈاکٹر حسن امیر شاہ اورعلامہ اقبال کے پوتے منیب اقبال نے کمرے کا افتتاح کیا۔تاریخی دستاویزات سے یہ بات تو عیاں تھی کہ علامہ اقبال گورنمنٹ کالج کے بورڈنگ ہاﺅس جواب اقبال ہاسٹل کہلاتا ہے میں رہائش پذیر رہے،لیکن کوئی مستند شہادت یا دستاویزاتی ثبوت نہ ہونے کی وجہ سے تقریباََ 120سال گزر جانے کے باوجود ان کے بورڈنگ ہاﺅس میں اصل کمرے کا تعین نہ ہوسکا تھا۔علامہ اقبال کے بیٹے جسٹس جاوید اقبال نے بھی اپنی وفات سے قبل اس خواہش کا اظہا رکیا تھا کہ گورنمنٹ کالج کے بورڈنگ ہاﺅس میں علامہ اقبال کے اصل کمرے کا تعین کیا جائے،چنانچہ اس اہم تحقیق کے لیئے جی سی یو وائس چانسلر نے ممتاز پروفیسر ڈاکٹر ظہیر احمد صدیقی ،ڈاکٹر خورشید رضوی اورجرمنی سے اقبالیات میں پی ایچ ڈی کرنے والے ڈاکٹر خالد محمود سنجرانی پر مشتمل 3رکنی کمیٹی تشکیل دی تھی،جس نے طویل تحقیق کے بعد علامہ اقبال کے کمرے کا تعین کیا۔ڈاکٹر خورشید رضوی کے مطابق غلام بِھک نیرنگ نے انتہائی عمدہ اور تفصیلی انداز میں علامہ اقبال کے کمرے کے محلِ وقوع کا ذکر کیا ہے کہ اس میں کوئی بھی ابہام باقی نہیں رہتا۔اس موقع پر وائس چانسلر پروفیسر ڈاکٹر حسن امیر شاہ کا کہنا تھا کہ کمرہ پچھلے تقریباََ120برس سے اپنی اصل حالت میں موجودہے اور اس میں ایک اینٹ کی بھی تبدیلی نہیں کی گئی،جبکہ اس کمرے میں فرنیچر بھی اُ سی دور کا ہے۔انہوں نے اعلان کیا کہ یہ کمرہ پوزیشن ہولڈرز کو الاٹ کیا جائے گا،کمرے میں علامہ اقبال کی زمانہ طالبعلمی میں لکھی گئی نظموں کی فہرست، غلام بِھک نیرنگ کا مضمون اور اقبال کی نظموں کے مسودات آویزں کیئے گئے ہیں۔اس موقع پر منیب اقبال کا کہنا تھا کہ یہ کمرہ علامہ اقبال کی لاہورمیں پہلی رہائش گاہ تھی اور اس کی دریافت ان کے والد صاحب کی بھی خواہش تھی۔انہوں نے کہا کہ یہ ایک اہم قومی فریضہ تھا جو اس بورڈنگ ہاﺅس کی 125سالہ تقریبات کے موقع پر مکمل ہوا۔ڈاکٹر خورشید رضوی کا کہنا تھا کہ قدرت بعض اوقات کچھ چیزوں کو اچھے وقت کے لیئے پوشیدہ رکھتی ہے اس بورڈنگ ہاﺅس کی125سالہ تقریبات پر غلام بِھک نیرنگ کے مضمون سے علامہ اقبال کے کمرے کا دریافت ہونا بھی ایسا ہی ایک عمل ہے۔