کراچی (نیوزڈیسک)معاشرے کے معذور افراد کو سہارا دینا ہم سب کی ذمہ داری اور بہت بڑی نیکی کا کام ہے۔ سب سے پہلے سیدنا فاروق اعظم ؓ نے بیت المال سے بچوں اور معذور افراد کے وظیفے جاری کئے ۔ حضرت عمر ؓ کے بنائے ہوئے اصول وقوانین آج یورپ میں بھی نافذ ہیں ۔ لیکن افسوس سے کہنا پڑتا ہے کہ ہمارے پاکستانی معاشرے میں معذور افراد کی دیکھ بھال کا کوئی منظم انتظام موجود نہیں۔ ان خیالات کا اظہار نصرت ٹرسٹ فار اسپیشل چلڈرن کے فنانس سیکریٹری مفتی ابو طلحہ محی الدین نے فوڈ ہیلپ کی تقریب سے خطاب کرتے ہوئے کیا۔ اس موقع پر دو سو سے زائد غریب معذور بچوں میں ماہانہ ہزار روپے تقسیم کئے گئے۔ مفتی ابوطلحہ نے کہا کہ نصرت ٹرسٹ معذور بچوں کو قومی دہارے میں لانے اور معاشرے کاکارآمد فرد بنانے کیلئے بھرپور کوشش کر رہا ہے۔ نصرت ٹرسٹ غریب معذور بچوں کی خوراک کے مسائل کو کم کرنے کے لئے فوڈ ہیلپ اسکیم کے تحت مستقل بنیادوں پر گذشتہ پانچ سال سے فوڈ ہیلپ تقسیم کررہا ہے جس سے دو سو سے زائد معذور بچے مستفید ہورہے ہیں۔ فنڈز کی کمی کے باعث اب بھی سینکڑوں بچے فوڈ ہیلپ کے منتظر ہیں ۔ جنہیں فنڈز آنے پر فوری رجسٹر کیا جائے گا۔ مفتی ابو طلحہ نے آخر میں کہا کہ نصرت ٹرسٹ کے معذور بچوں کے لئے فوڈ ہیلپ اور مفت وہیل چیئر کی تقسیم کے جاری منصوبوں کے لئے اہل خیر حضرات زکوٰة صدقات و عطیات بھرپور تعاون کریں ۔