اسلام آباد(نیوز ڈیسک ) سعودی حکومت نے پاکستانی حج کوٹے میں اضافے اور دیگر معاملات طے کرنے کیلئے طے شدہ میٹنگ فروری کے مہینے تک موخر کر دی ہے ،میٹنگ میں تاخیر کی وجہ سے پاکستانی حکام کو رواں سال حج پالیسی طے کرنے میں مشکلات کا سامنا ہے ،کوٹہ بڑھنے کی صورت میں پاکستانی حکام کو مذید 40ہزار حجاج کیلئے ٹرانسپورٹ رہائش اور دیگر انتظامات کرنے ہونگے جس سے حج اخراجات میں اضافے کا امکان ہے۔وزارت مذہبی امور کے ذرائع کے مطابق پاکستانی حج مشن اور سعودی حکام کے مابین پاکستانی حاجیوں کی تعداد اور دیگر امور طے کرنے کے لئے 4جنوری کو ہونے والی میٹنگ سعودی حکام کی جانب سے منسوخ کر دی گئی ہے اور امکان ہے کہ یہ میٹنگ فروری کے تیسرے اور چوتھے ہفتے کے درمیان ہوگی 1988کی مردم شماری کے مطابق1لاکھ 80ہزار پاکستانیوں کو کوٹے کے مطابق حج کرنے کی اجازت ہے تاہم حرم شریف کی توسیع کے پروگرام کی وجہ سے سعودی حکومت نے تمام ممالک کے حج کوٹے میں 20فیصد تک کمی کردی تھی چونکہ حرم شریف کی توسیع کا کام اگلے چندمہینوں میں مکمل ہوجائیگالہذا پاکستانی حکام کو یہ امید ہے کہ اس سال پاکستان کاکوٹہ دوبارہ بحال ہوجائیگاجس کے بعد پاکستانی حکام کو تقریباً40ہزار کے قریب پاکستانیوں کے لئے رہائش ٹرانسپورٹ اور دیگر انتظامات کرنے ہونگے ذرائع کے مطابق حج معاملات طے نہ ہونے کیو جہ سے پاکستانی حکام کو انتظامات کے سلسلے میں مشکلات پیش آسکتی ہیں جس سے نمٹنے کیلئے وزارت مذہبی امور نے انتظامات شروع کر دئیے ہیں ۔