رائے ونڈ (نیوزڈیسک) گورنمنٹ کالج برائے خواتین رائے ونڈ میں سیرت النبی کانفرنس سے خطاب کرتے ہوئے وفاقی وزیر ریلوے خواجہ سعد رفیق کی اہلیہ غزالہ سعد نے کہا کہ اللہ قوم کواپنی نافرمانی کی سزا دے رہا ہے ،قوم نے ایک دوسرے کو خیر کی تلقین کرنا اور برائی سے روکنا چھوڑ دیا ہے ،معاشرے میں شر کا لیول بڑھ رہا ہے ،اعمال کے رک جانے سے دعاﺅں کا اثر ختم ہوگیا ہے ۔انہوںنے کہا کہ اللہ کے پیارے بنی نے اللہ کا یہی حکم دیا تھا کہ نماز کی حفاظت اور اپنے ماتحت پر رحم کرو،نماز کے بغیر مسلمان بغیر سرکے جسم جیسا ہے ،آج غیر مسلم مسلمانوں کے اقوال زریں کو اپنا کر آگے نکل گئے ہیں لیکن جنہوں نے ان سنہری اصولوں کو اپنا کر 900سال حکومت کی وہ اپنے ہی دین کے منافی چل کر پیچھے رہ گئے ہیں ،آج بھی توبہ کرکے اور اللہ کو راضی کرلیں تومسلمان اپنا کھویا ہوا مقام واپس حاصل کر سکتے ہیں ،اسلام پسماندہ نہیں ماڈرن دین اور مکمل ضابطہ حیات ہے ،انہوں نے مزید کہا اللہ نے نعت پڑھنے کے صدقے ہی خواجہ سعد رفیق جیسا ہم سفر عطا کیا ہے ، ہم وعدوں کی سیاست نہیں کرتے ،عمل پر یقین رکھتے ہیں ۔پرنسپل ڈاکٹر راشدہ قریشی نے خطاب میں کہا کہ اللہ تعالیٰ کے محبوب حضرت محمد ہیں اور نبی کی محبوب امت ہم ہیں ۔عید میلاد سب سے بڑی اور عظمت والی عید ہے، اللہ نے اپنے محبوب کا ذکر سب سے بلند کیا ہے اور یہ ذکر رہتی دنیا تک بڑھتا رہے گا ۔سرت النبی کانفرنس میں ایم پی اے لبنیٰ فیصل اور مسز عاطف سبزواری نے بھی شرکت کی ،طالبات نے سیرت النبی کے حوالے سے تقریریں کیں اور سرور کائنات کے حضور نذرانہ عقیدت پیش کیا ۔