کراچی (این این آئی) بلاول زرداری بھی سلمان تاثیر کے نقش قدم پر چل پڑے،دھواں دھار بیان جاری،پاکستان پیپلزپارٹی کے چیئرمین بلاول بھٹو زرداری نے کہا ہے کہ سلمان تاثیر نے اس ملک کے کمزور اور پسماندہ لوگوں کے تحفظ اور ملکی قانون کے استحصال اور اس کے غلط استعمال کے خلاف اپنی جان قربان کی، سابق گورنر پنجاب سلمان تاثیر کے پانچویں برسی کے موقع پر اپنے پیغام میں انہیں خراج عقیدت پیش کرتے ہوئے چیئرمین بلاول بھٹو زرداری نے کہا کہ لاہور قلعہ کی کال کوٹھڑیوں سے لے کر شہادت تک سلمان تاثیر تاریخ کا ایک عظیم کردار رہے جنہوں نے اپنی تمام زندگی جمہوریت اور انسانی حقوق کے تحفظ کے لیے قوم کے ایک سچے ہیرو کی طرح جدوجہد کرتے ہوئے گذاری اور شہادت پائی، بلاول بھٹو زرداری نے مزید کہا کہ سلمان تاثیر ذوالفقار علی بھٹو اور محترمہ بینظیر بھٹو کے مشن پر چلتے ہوئے ان قوتوں کے خلاف پہاڑ کی مانند ڈٹے رہے جو قوتیں اس ملک کو پتھر کے تاریک دور میں دھکیلنا چاہتے ہیں، آمریتی ادوار میں یہ قوتیں جان بوجھ کر پیدا کی گئیں تاکہ اس ملک کے عوام کو جمہوریت، انسانی حقوق اور برابری سے دور رکھا جائے اور عوام کے اختیارات کو عرصہ دراز تک غصب کیا جا سکے، بلاول بھٹو زرداری نے مزید کہا کہ پاکستان پیپلزپارٹی نے ہمیشہ اس ملک میں کسی بھی فرد یا گروپ کی جانب سے مذہب کے متعلق ملکی قانون کا غلط استعمال کرنے کے خلاف آواز اٹھائی ہے، انہوں نے اختیاریوں سے کہا ہے کہ مذہب کے متعلق ملکی قانون کا غلط استعمال کرنے والوں کے خلاف نیشنل ایکشن پلان کے نقطہ نمبر 9کے مطابق قدم اٹھایا جائے جس میں کہا گیا ہے کہ ” مذہبی اقلیتوں پر ہونے والے مظالم کے خلاف پر اثر اقدامات اٹھائے جائیں گے“۔ انہوں نے یاد دلاتے ہوئے کہا کہ آج تک نیشنل ایکشن پلان کے اس اہم نقطہ کے تحت کوئی بھی قدم نہیں اٹھایا گیا ہے، بلاول بھٹو زرداری نے کہا کہ پورا ملک خاص طور پر اس ملک کے کمزور طبقات اور پاکستان پیپلزپارٹی کے ممبران اور کارکنان سلمان تاثیر کو کبھی بھی نہیں بھولیں گے اور سلمان تاثیر تمام محب وطن پاکستانیوں کے دل و دماغ میں ہمیشہ عزت کی نگاہ سے رہیں گے جو چاہتے ہیں اور جدوجہد عمل ہیںکہ پاکستان اس کے بانیان کے ویژن کی حقیقی عکاسی کرے، بلاول بھٹو زرداری نے کہا کہ آیئے سلمان تاثیر کے روح کو ایصال ثواب پہنچانے اور انہیں خراج عقیدت پیش کرنے کے لیے پورے ملک میں دعائیں مانگیں تاکہ یہ ثابت کریں کہ کچھ بھی ہو جائے لیکن ہم اپنے ہیروز کو کبھی نہیں بھلاتے۔واضح رہے سلمان تاثیر کے متنازعہ بیانات پر ممتاز قادری نے اشتعال میں آکر انہیں قتل کردیاتھا۔