لاہور(نیوزڈیسک)صوبائی وزیر قانون رانا ثنا اللہ خان نے احتجاج کرنے والے اراکین کو تنخواہوں او رمراعات میں اضافے کا دوبارہ لالی پاپ دے دیا۔گزشتہ روز پنجاب اسمبلی کے اجلاس میں حکومتی رکن ڈاکٹر فرزانہ نذیر نے ایوان میں کھڑے ہو کر وعدے کے باوجود اراکین کی تنخواہوں اور مراعات میںاضافہ نہ کرنے پر احتجاج کیا جس پر دیگر خواتین اراکین بھی اپنی نشستوں پرکھڑی ہو گئیں اور مرد اراکین نے بھی اپنی نشستوں پر بیٹھے ہوئے ہی اس کی حمایت کی ۔راناثنا اللہ خان نے ایوان میں بتایا کہ پنجاب کے اراکین اسمبلی کی تنخواہیں اور مراعات باقی تینوں صوبوں کی اسمبلیوں کے برابر کرنے کیلئے بل تیار تھا لیکن ہمارا موقف تھاکہ تمام جماعتوں کے پارلیمانی لیڈرز اس پر اپنی رضا مندی ظاہر کر دیں ۔ بزنس ایڈوائزری کمیٹی کے اجلاس میں قائد حزب اختلاف میاں محمود الرشید کے سامنے تمام پارلیمانی لیڈرز نے اسکی منظوری دیدی ہے اب ہم اس بل کو پیش کرنے جارہے ہیں ۔ جس پر ڈاکٹر فرزانہ نذیر نے کہا کہ کہیں یہ ”لارے بازی “تو نہیں جس پر اسپیکر نے کہا کہ اچھے کی امید رکھیں ۔ڈاکٹر فرزانہ نذیر نے اسپیکر کو مخاطب کرتے ہوئے کہا کہ یہ آپ کی ضمانت ہے جس پر اسپیکر نے کہا کہ وزیر قانون نے آپ سے ایوان میں وعدہ کیا ہے ۔ تاہم گزشتہ روز سرکاری کارروائی مکمل ہونے کے بعد پنجاب اسمبلی کا اجلاس غیر معینہ مدت تک کیلئے ملتوی کر دیاگیا اور اراکین کی تنخواہوں اور مراعات میں اضافے کا بل ایوان میں پیش نہ ہو سکا۔