لاہور(آن لائن) وزیراعلیٰ پنجاب میاںشہبازشریف نے لاہور میں ”پاک چین دوستی عمارت“(مونومنٹ) کا افتتاح کردیا ، چینی سفیر سن ویڈانگ اورصوبائی وزراءاور مشیروں کی تقریب میں شرکت تھے۔تفصیلات کے مطابق وزیراعلیٰ پنجاب نے لاہور مال روڈ پر پاک چین مونومنٹ کا افتتاح کیا ۔اس موقع پر صوبائی وزراء، سیکرٹریز اور مشیروں کی بڑی تعداد موجودتھی۔وزیراعلیٰ نے میڈیا سے مختصر گفتگو کرتے ہوئے کہاکہ پاک چین فرینڈ شپ پویلین دونوں ممالک کی حکومتوں اورعوام کے درمیان دوستی کی لازوال مثال ہے ۔پاکستان میں چین کے تعاون سے بہت سے منصوبے شروع کیے گئے ہیں جس میں سب سے بڑا پراجیکٹ پاک چین اقتصادی راہداری ہے جس پر 46ارب ڈالرخرچ کیے جائیں گے ان 46ارب میں سے 36 ارب ڈالر بجلی کے منصوبوں پر لگائے جائیں گے جبکہ باقی انفراسٹرکچر کی تعمیر ،گوادرپورٹ اور موٹروے کی تعمیر پر خرچ کیے جائیں گے۔اس موقع پر چینی سفیر سن ویڈانگ نے گفتگو کرتے ہوئے کہا کہ پاک چین دوستی تاریخی ہے اور اس میں ”پاک چین فرینڈ شپ یویلین“ دوستی کی بہترین مثال ہے ، یہ مونومنٹ پاکستانی عوام کو چین کی طرف سے ایک اور تحفہ ہے ۔انہوں نے کہاکہ پاکستان کے عوام چین سے بے پناہ محبت کرتے ہیں جس پر میں ان کا شکرگزار ہوں اور پاکستان کے ساتھ ہماری دوست ہمیشہ قائم رہے گی ۔انہوں نے کہاکہ چین پاکستان کو پھلتا پھولتا دیکھنا چاہتا ہے اور اس مقصد کے لئے دونوں ممالک کو ہمیشہ کی طرح آج بھی ملکر کام کرنا ہو گا ۔