اسلام آباد (نیوزڈیسک)آصف علی زرداری پھر ”میدان“میں،پاکستان پیپلز پارٹی کے شریک چیئرمین سابق صدر آصف علی زرداری نے سندھ اور پنجاب میں بلدیاتی انتخابات کے پہلے مرحلے میں کامیاب ہونے والوں کو مبارکباد دی ہے اور کہا ہے کہ اختیارات نچلی سطح پر منتقل کرنے کے لئے آگے کی جانب ایک قدم ہے۔ انہوں نے پاکستان پیپلز پارٹی کے منتخب ہونے والے امیدواروں کو مبارکباددیتے ہوئے کہا کہ جو لوگ پیپلزپارٹی کے بارے میں ایسے تبصرے کررہے تھے کہ پارٹی کی صورتحال نہایت خراب ہے اور پارٹی ختم ہوگئی ہے ان کی ساری پیشن گوئیاں خاک میں مل گئی ہیں۔ انہوں نے کہا کہ بلدیاتی انتخابات کے آئندہ مراحل مکمل ہونے کے بعد اختیارات نچلی سطح تک منتقل ہو جائیں گے اور یہ جمہوری نظام کا ایک اہم جزو ہے۔ سابق صدر کے ترجمان سینیٹر فرحت اللہ بابر نے کہا کہ آصف علی زرداری نے کہا ہے کہ انتخابات کے مکمل ہونے سے جمہوریت مضبوط ہوگی اور جمہوری نظام میں زیادہ سے زیادہ لوگ شریک ہو جائیں گے۔ انہوں نے انتخابات میں خیرپور اور فیصل آباد میں ناخوشگور واقعات میں افراد کے جاں بحق ہونے پر سخت دکھ اور افسوس کا اظہار کیا اور کہا کہ ایسے واقعات کے دوبارہ وقوع پذیر ہونے سے روکنے کے لئے اقدامات کئے جائیں۔ آصف علی زرداری نے پارٹی کے مختلف سطح کے عہدیداروں سے کہا کہ بلدیاتی انتخابات کے اگلے مراحل کی تیاری کریں۔ انہوں نے کہا کہ انتخابی مقابلہ پارلیمانی جمہوریت کا اہم جزو ہے اور حقیقی انتخابات کے ذریعے عوام کے حقیقی نمائندے سامنے آتے ہیں۔ انہوں نے نو منتخب نمائندوں سے کہا کہ وہ عوام کی خدمت کے لئے خود کو وقف کر دیں۔