اسلام آباد(نیوز ڈیسک)لاہور کے اضلاع میں قومی اسمبلی کی13نشستوں میں سے حلقہ این اے 122مخالف امیدواروں کے خلاف بھاری سبقت لے جانے کے حوالے سے ن لیگ کیلئے کمزور ترین حلقہ ہے، کیونکہ 2013کے عام انتخابات میں اس نشست پر ن لیگ کو دیگر 12حلقوں کے مقابلے میں کم سبقت حاصل ہوئی تھی۔جنگ رپورٹر طارق بٹ کے مطابق تاہم این اے 126پر ن لیگ کے امیدوار خواجہ احمد حسن کو تحریک انصاف کے شفقت محمود نے5453ووٹوں کے فرق سے شکست دی۔ ن لیگ نے دیگر 12نشستوں پر بھاری سبقت سے کامیابی حاصل کی او ر لاہور پر اپنی گرفت ثابت کی۔ الیکشن کمیشن کےریکارڈ کے مطابق ایاز صادق کو گزشتہ عام انتخابات میں این اے 122کی نشست پر 8862ووٹ کے مارجن سے فتح حاصل ہوئی ، جوکہ دیگر حلقوں میں ن لیگ کے امیدواروں کی جانب سے مخالفین کو ہرانے کا سب سے کم مارجن ہے۔قومی اسمبلی کے سابق اسپیکر نے اتوار کے روز 2443ووٹوں کے مارجن سے تحریک انصاف کے علیم خان کو شکست دی۔ این اے 118میں ن لیگ کے ریاض ملک نے تحریک انصاف کے حامد زمان کو 59730ووٹوں کے مارجن سے شکست دی تھی۔ این اے 119 میں ن لیگ کے حمزہ شہباز نے تحریک انصاف کے محمد مدنی کو 66914ووٹوں کے مارجن سے شکست دی تھی۔ این اے 120 میں ن لیگ کے صدر نواز شریف نے تحریک انصاف کی امیدوار یاسمین رشد کو 39329ووٹو ں کے فر ق سے شکست دی۔ این اے 121میں ن لیگ کے مہر اشتیاق نے تحریک انصاف کے حماد اظفر کو 46167ووٹوں سے شکست دی