لاہور(نیوزڈیسک) لاہور ہائیکورٹ نے چینی قونصلیٹ کی سکیورٹی کے نام پر سروس روڈکی بندش اور پختہ تعمیرات کے خلاف دائر درخواست پر فیصلہ محفو ظ کر لیا۔گزشتہ روز لاہور ہائیکورٹ میں جسٹس شجاعت علی خان نے کیس کی سماعت شروع کی تو درخواست گزار رانا سجاد صدیق کی جانب سے موقف اختیار کیا گیا کہ کیمپس پل کے قریب چینی قونصلیٹ کی تعمیر جاری ہے اور قونصلیٹ کو سکیورٹی فراہم کرنے کے نام پر سروس روڈ کو پختہ بنکرزتعمیر کر کے بند کر دیا گیا ہے جس کے باعث اردگرد کے رہائشیوں کو اپنے ہی گھروں میں محصور کر کے خوف وہراس میں مبتلا کر دیا گیا ہے ۔ درخواست گزار کی جانب سے مزید موقف اختیار کیا گیا کہ آئین کے تحت کسی شہری کی نقل و حرکت پر پابندی عائد نہیں کی جا سکتی نہ ہی کسی شاہرہ کو بند رکھا جا سکتا ہے۔ عدالتی حکم پر قائم لوکل کمیشن نے موقع کا جائزہ لے کر اپنی رپورٹ عدالت میں جمع کرا دی۔ عدالت نے فریقین کے وکلاءکی جانب سے لوکل کمیشن کی رپورٹ پر جرح مکمل ہونے کے بعد درخواست پر فیصلہ محفوظ کر لیا۔