اسلام آباد (نیوز ڈیسک)جمعہ کے روز انٹربینک مارکیٹ میں امریکی ڈالر کی قدر میں معمولی کمی دیکھی گئی، جبکہ سونے اور چاندی کی قیمتوں میں غیر معمولی اضافہ جاری رہا، جس کے باعث قیمتی دھاتیں تاریخ کی بلند ترین سطح پر پہنچ گئیں۔اسٹیٹ بینک کے اعداد و شمار کے مطابق انٹربینک میں ڈالر ایک پیسے سستا ہو کر 279 روپے 86 پیسے پر بند ہوا، جبکہ گزشتہ روز ڈالر 279 روپے 87 پیسے پر اختتام پذیر ہوا تھا۔دوسری جانب عالمی بلین مارکیٹ میں سونے کی قیمتوں نے نیا ریکارڈ قائم کیا۔ بدھ کے روز بین الاقوامی مارکیٹ میں سونا 94 ڈالر اضافے کے ساتھ 4 ہزار 923 ڈالر فی اونس تک پہنچ گیا۔ عالمی سطح پر قیمتوں میں اضافے کے اثرات مقامی مارکیٹ میں بھی نمایاں طور پر دیکھے گئے۔

ملک میں فی تولہ سونے کی قیمت میں 9 ہزار 100 روپے کا بڑا اضافہ ریکارڈ کیا گیا، جس کے بعد پہلی مرتبہ سونا 5 لاکھ 15 ہزار 662 روپے فی تولہ کی سطح پر جا پہنچا۔ اسی طرح 10 گرام سونا 7 ہزار 802 روپے مہنگا ہو کر 4 لاکھ 41 ہزار 239 روپے میں فروخت ہونے لگا۔واضح رہے کہ اس سے ایک روز قبل جمعرات کو سونے کی فی تولہ قیمت میں 800 روپے کی کمی واقع ہوئی تھی اور قیمت 5 لاکھ 5 ہزار 562 روپے رہی تھی۔چاندی کی قیمتوں میں بھی تیزی دیکھنے میں آئی، جہاں فی تولہ چاندی 372 روپے اضافے کے بعد پہلی بار 10 ہزار روپے کی حد عبور کرتے ہوئے 10 ہزار 275 روپے تک پہنچ گئی۔