اسلام آباد(نیوز ڈیسک) سابق وزیراعظم بینظیر بھٹو قتل کیس کے انتہائی اہم گواہ امریکی صحافی مارک سیگل پیر14ستمبر کو اپنا بیان قلمبند کروائیں گے، ذرائع کے مطابق اس بارے انہوں نے دفتر خارجہ کو باضابطہ طور پر آگاہ کر دیا ہے، مارک سیگل شام ساڑھے سات بجے ویڈیو لنک کے ذریعے اپنا بیان ریکارڈ کروائیں گے جس کا بندوبست عدالتی حکم پر کمشنر آفس راولپنڈی میں پہلے سے ہی کر دیا گیا ہے جہاں انسداد دہشت گردی کی خصوصی عدالت نمبر ایک راولپنڈی کے جج رائے محمد ایوب خان مارتھ عدالت لگائیں گے، اس موقع پر استغاثہ اور وکلا صفائی بھی موجود ہونگے جن کے سامنے بیان ریکارڈ ہوگا اور وکلا صفائی اس پر جرح بھی کریں گے،
معلوم ہوا ہے کہ دفتر خارجہ کے ذمہ داران اسی روز مارک سیگل کا بیان قلمبند کروانے کے حوالے سے باقاعدہ عدالت کو آگاہ کریں گے، ذرائع کے مطابق پونے آٹھ برس پرانے اس کیس میں مارک سیگل کا بیان اس لئے بھی انتہائی اہمیت کا حامل ہے کیونکہ قریبی ساتھی ہونے کے ناطے بینظیر بھٹو اپنے اس دوست سے تقریباً ہر بات شیئر کرتی تھیں، امکان ہے کہ مارک سیگل کے بعد تفتیشی افسران کے بیانات قلمبند ہو جانے پر دو بار کی وزیراعظم کے قتل کیس کا فیصلہ 27دسمبر کو ہونے والی ان کی آٹھویں برسی سے قبل ہو جائے گا۔
