اسلام آباد ۰نیوز ڈیسک)پنجاب یونیورسٹی نے عیدالفطر 2026 اور موسمِ بہار کی تعطیلات کے حوالے سے باضابطہ شیڈول جاری کر دیا ہے۔
اس ضمن میں رجسٹرار آفس اور اکیڈمک برانچ (ریکارڈ سیکشن) کی جانب سے نوٹیفکیشن جاری کیا گیا۔اعلامیے کے مطابق عیدالفطر کے موقع پر جامعہ 20 مارچ 2026 بروز جمعہ سے 23 مارچ 2026 بروز پیر تک مکمل طور پر بند رہے گی۔ اس عرصے میں تمام تدریسی و انتظامی شعبے، دفاتر، ذیلی ادارے، مراکز، الحاق شدہ کالجز اور اسکولوں میں سرگرمیاں معطل رہیں گی۔ انتظامیہ کا کہنا ہے کہ یہ فیصلہ طلبہ اور ملازمین کو عید کی مناسبت سے سہولت فراہم کرنے کے لیے کیا گیا ہے۔عید کی چھٹیوں کے فوراً بعد موسمِ بہار کا وقفہ بھی دیا جائے گا۔ نوٹیفکیشن کے مطابق 24 مارچ بروز منگل سے 27 مارچ بروز جمعہ تک تدریسی شعبہ جات اور متعلقہ تعلیمی ادارے بند رہیں گے۔ تاہم انتظامی عملہ 24 مارچ سے اپنی ذمہ داریاں معمول کے مطابق انجام دیتا رہے گا تاکہ دفتری امور متاثر نہ ہوں۔تعلیمی سرگرمیوں کا باقاعدہ آغاز 30 مارچ 2026 بروز پیر سے ہوگا۔
اس طرح طلبہ کو مسلسل چند روز کی چھٹیاں میسر آئیں گی، جس سے وہ عید کی خوشیاں منانے کے ساتھ آرام اور آئندہ تعلیمی تیاری کے لیے بھی وقت نکال سکیں گے۔نوٹیفکیشن پر رجسٹرار ڈاکٹر احمد اسلام کے دستخط موجود ہیں اور اس کی نقول تمام ڈینز، پرنسپلز، ڈائریکٹرز، چیئرمینز اور متعلقہ کیمپسز کو ارسال کر دی گئی ہیں تاکہ جاری کردہ شیڈول پر عملدرآمد یقینی بنایا جا سکے۔ یونیورسٹی انتظامیہ نے طلبہ اور عملے کو ہدایت کی ہے کہ وہ اپنے تعلیمی اور سفری منصوبے اسی شیڈول کے مطابق ترتیب دیں۔
