اسلام آباد(نیوزڈیسک) سینیٹ کی مجلس قائمہ برائے قانون و انصاف نے سمندر پار پاکستانیوں کے لئے پوسٹل ووٹنگ کے مجوزہ طریقہ کو انتخابی آرڈیننس سے متصادم قرار دیتے ہوئے مسترد کرتے ہوئے اصلاحات کمیٹی کو اس کا دوبارہ جائزہ لینے کی ہدایت کی ہے۔ منگل کے روز مجلس قائمہ کا اجلاس سینیٹر جاوید جبار کی سربراہی میں منعقد ہوا‘ جس میں فاضل کمیٹی نے فیڈرل جوڈیشل اکیڈمی کی جانب سے ڈگری کے اجراء سے متعلق سفارشات کو مسترد کرتے ہوئے قرار دیا کہ اکیڈمی کا کام افسران کی تربیت ہے‘ ڈگری کا اجراء نہیں ہے‘ کمیٹی نے چیف جسٹس اسلام آباد ہائی کورٹ کی سربراہی میں جوڈیشل بورڈ آف گورنر (آرڈیننس2014،ایف جے اے) بنانے کی تجویز کی منظوری بھی دی۔ اجلاس کے دوران کمیٹی میں آئین کے آرٹیکل 140-Aمیں ترمیم کے حوالہ سے سنیٹر محسن لغاری جبکہ آرٹیکل 37 کے حوالہ سےسنیٹر حماد اللہ کی جانب سے دو پرائیویٹ بل بھی پیش کئے گئے‘ کمیٹی نے بل کی کاپیاں شرکاء کو فراہم کرنے کی ہدایت کرتے ہوئے قرار دیا آئندہ اجلاس تک ان بلوں کا جائزہ لیا جائے۔ دوران اجلاس ڈی جی نیب نے بدعنوانی کے خلاف کئے جانے والے اقدامات سے متعلق بریفنگ دی۔ اجلاس میں سینیٹرز اعتزاز احسن‘ حماد اللہ‘ محسن لغاری‘ فیڈرل جوڈیشل اکیڈمی اور نیب کے ڈی جی حضرات اور سیکرٹری لاء اینڈ جسٹس و انسانی حقوق نے شرکت کی