پشاور(نیوزڈیسک)وزیر اعلیٰ خیبر پختونخوا کے معاون خصوصی برائے ہاﺅسنگ ڈاکٹر امجد علی نے یونین کونسلوںپانڑڑی اور کوٹا سوات میں شمسی توانائی سے چلنے والے ٹیوب ویلوں کے منصوبوں کا افتتاح کیا جن پر مجموعی طور پر 80لاکھ روپے لاگت آئی ہے۔ اور ان سے علاقے کی بہت بڑی آبادی کو سہولت میسر آئے گی۔ افتتاحی تقریب سے خطاب کر تے ہوئے ڈاکٹر امجدعلی نے کہا کہ مذکورہ منصوبے عوام کی دیرینہ ضرورت تھی اور بجلی کی لوڈ شیڈنگ اور کم وولٹیج کے دوران لوگوں کو گونا گوں مشکلات کا سامنا کرنا پڑتا تھا جنہیں پیش نظر رکھتے ہوئے شمسی توانائی کے زریعے ٹیوب ویلوں کو فعال بنایا گیا ہے تاکہ مستقل بنیادوں پر مسائل کو حل کیا جا سکے۔معاون خصوصی نے کہا کہ ماضی کی حکومتوں نے مستقل بنیادوں پر مسائل کو حل کرنے کیلئے منصوبہ بندی نہیں کی جس کے باعث آج غریب لوگوں کو لاتعداد دشواریوں کا سامنا ہے یہی وجہ ہے کہ تحریک انصاف ایک ایسا نظام وضع کرنے کیلئے کوشاں ہے جس کے ذریعے حق دار کو بغیر کسی دشواری کے اس کا حق مل سکے ۔انہوں نے اپنے حلقہ کے عوام کو یقین دلایا کہ انہیں صحت ، تعلیم،آبنوشی و آبپاشی،اور آمدورفت کی سہولتیں فراہم کرنے کیلئے وہ اپنی تمام تر توانائیاں صرف کریں گے۔ اس موقع پر اظہار خیال کرتے ہوئے دیگر مقررین نے صوبائی حکومت کی جانب سے سوات کی تعمیر و ترقی میںگہری دلچسپی لینے پر اس کا سکریہ اداکیا اور اس امید کا اظہار کیا کہ تحریک انصاف اپنے وعدوں کو پورا کرتے ہوئے عوام کو ترقی اور خوشحالی سے ہمکنار کرنے میں کامیاب ہوگی۔