اسلام آباد(نیوزڈیسک) وفاقی ترقیاتی ادارہ ( سی ڈی اے ) نے وفاقی دارالحکومت میں بڑھتی ہوئی ہاﺅسنگ سکیموں اور تجاوزات کو روکنے کیلئے سیٹلائٹ تصاویر حاصل کرنے کا فیصلہ کرلیا ہے ۔ ذرائع کے مطابق سی ڈی اے کے پلاننگ ونگ نے سیٹلائٹ تصاویر حاصل کرنے کے لیے سپارکو سے بھی رابطہ کیا ہے جبکہ سی ڈی اے حکام نے آن لائن سے بات کرتے ہوئے کہا کہ یہ فیصلہ اسلام آباد میں بڑھتی ہوئی غیر قانونی ہاﺅسنگ سکیموں اور تجاوزات کی بڑھتی ہوئی تعداد کو روکنے کیلئے کیا گیا ہے ۔ محکمہ نے سپارکو سے شہر کی سیٹلائٹ تصاویر پر آنے والی لاگت اور ان پر درکار وقت کے بارے میں بھی پوچھا جبکہ ایک اندازے کے مطابق منصوبے پر 1.6ملین روپے کی لاگت درکار ہوگی ۔ سی ڈی اے حکام کا مزید کہنا تھا کہ سیٹلائٹ تصاویر کی مدد سے منیجرز کو سمجھنے میں آسانی پیدا ہوگی اور ان تصاویر کی مدد سے معلوم کیاجاسکتا ہے کہ غیر قانونی سکیموں پر کتنی حد تک ترقیاتی کام مکمل کرلیا گیا ہے ۔