اسلام آباد (نیوزڈیسک)سپرماڈل ایان علی کی جانب سے ملک چھوڑ کر نہ جانے کی یقین دہانی پر عدالت سے ضمانت ملی ۔سپرماڈل کے وکیل خرم لطیف کھوسہ نے بتایا کہ سماعت کے دوران ایان علی نے عدالت سے یہ وعدہ کیا تھا کہ اگر ان کی ضمانت منظور ہوگئی تو وہ ملک چھوڑ کر نہیں جائیں گی۔انہوں نے کہا کہ سپرماڈل نے عدالت کو اس بات سے بھی مطلع کیا تھا کہ ان کی طویل حراست سے ان کے شوبز کے کیریئر پر اثر پڑا ہے اس لیے کہ انہوں نے مختلف مشتہرین کے ساتھ بڑی تعداد میں معاہدے کررکھے ہیں۔تاہم خرم لطیف کھوسہ نے بتایا کہ ایان بیرون ملک کے دورے کی اجازت کے لیے عدالت میں ایک درخواست دائر کرسکتی ہیں۔انہوں نے کہا کہ ایسی کئی مثالیں موجود ہیں عدالت نے مخصوص وجوہات کی بناءپر ملزم کو بیرون ملک سفر کی اجازت دی ہےانہوںنے کہاکہ ٹرائل کورٹ یا ہائی کورٹس نے بہت سے مواقعوں پر ایسے ملزم کو جس کا مقدمہ زیرسماعت تھا، علاج معالجے، میڈیکل اسپیشلسٹ سے مشورے اور دیگر وجوہات پر بیرون ملک سفر کی اجازت دی خرم لطیف کھوسہ نے کہا کہ اگر بیرون ملک سفر کی اجازت دی گئی تو سپرماڈل یقینا واپس آجائیں گی اس لیے کہ وہ عدالتی کارروائی سے اپنی غیرحاضری کی متحمل نہیں ہوسکتیں۔ اگر وہ سماعت سے غیرحاضر رہیں تو عدالت ان کی گرفتاری کے وارنٹ جاری کرسکتی ہے، انہیں اشتہاری یا مفرور مجرم قرار دے سکتی ہے۔ایک سوال کے جواب میں ایڈوکیٹ کھوسہ نے کہا کہ ایان نے اپنی لیگل ٹیم سے اس سلسلے میں کوئی درخواست دائر کرنے کےلئے نہیں کہا ہے حالانکہ وہ بیرون ملک دورے کی اجازت حاصل کرنے کا حق رکھتی ہیں۔