لاہور (نیوز ڈیسک) سپریم کورٹ نے پسند کی شادی کرنے والی بیٹی کو شوہر سمیت باندھ کر قتل کرنے والے ملزم کی درخواست ضمانت خارج کر دی، سپریم کورٹ لاہوررجسٹری میں جسٹس میاں ثاقب نثار ،جسٹس آصف سعید کھوسہ اور جسٹس اقبال حمید الرحمن پر مشتمل بنچ کے روبرو ملزم لیاقت مسیح کی طرف سے موقف اختیار کیا گیاکہ اس پراپنی بیٹی شاہ تاج بی بی اور شفیق کو قتل کرنے کا الزام ہے۔یہ مقدمہ بدنیتی سے درج کروایاگیا اس نے اپنی بیٹی شاہ تاج بی بی اور اس کے شوہرشفیق کو قتل نہیں کیا بلکہ اس نے تو دونوں میاں بیوی کو گھر مدعو کیا تھا ، ایڈیشنل پراسکیوٹر جنرل اسجد گرال نے پولیس کی طرف سے تفتیشی رپورٹ پیش کرتے ہوئے موقف اختیار کیا کہ ملزم نے اپنی بیٹی اوربیٹے کو دھوکے سے گھر بلایا جس کے بعد ندیم اور اس کے ساتھیوں نے دونوں میاں بیوی کو باندھ کر گولیاں مار دیں، اس کیس کا چالان عدالت میں پیش ہو چکا ہے، لیاقت اور ندیم سمیت4 ملزم گرفتارجبکہ 2 اشتہاری ہیں اور پولیس نے 5افراد کو بے گناہ قرار دیا ہے جن میں مقتولہ کا والد لیاقت مسیح شامل نہیں ہے۔کیس کا ٹرائل شروع ہو چکا ہے اس لئے عدالتی فیصلوں کے مطابق ایسی صورتحال میں ملزم کو ضمانت پر رہا نہیں کیا جا سکتا ، فاضل بنچ نے پراسکیوشن کے دلائل سے اتفاق کرتے ہوئے ملزم لیاقت مسیح کی درخواست ضمانت خارج کر دی۔