اسلام آباد(نیوزڈیسک)پیپلزپارٹی کے رہنما فرحت اللہ بابر نے کہا ہے کہ تنویرزمانی نامی خاتون کی گفتگو میں آصف زرداری سے شادی کا تاثر غلط ہے، مذموم مہم چلانے والے جان لیں کہ آصف علی زرداری شہید محترمہ بے نظیر بھٹو کے شوہر کی حیثیت سے زندہ رہنا اور اسی حیثیت میں مرنا چاہتے ہیں ۔فرحت اللہ بابر نے ایک بیان میں کہا کہ آصف زرداری سے تنویر زمانی کی شادی کی افواہ اس وجہ سے بھی تقویت پاتی رہی کہ خاتون نے شادی سے متعلق سوال کا جواب نہیں دیا، آصف علی زرداری کی شادی کی افواہ ان کے دور صدارت میں 2011ءمیں بھی پھیلائی گئی تھی، اس وقت بھی اس خبر کی تردید کی تھی۔ فرحت اللہ بابر نے کہاکہ آصف علی زرداری کو یہ منفرد اعزاز حاصل ہے کہ وہ شہید محترمہ بے نظیر کے شوہر اور ذوالفقار علی بھٹو کے داماد ہیں ، ان کیخلاف مذموم مہم چلانے والے جان لیں کہ آصف علی زرداری تاریخ کا ادراک رکھتے ہیں، وہ شہید محترمہ بے نظیر بھٹو کے شوہر کی حیثیت زندہ رہنا اور اسی حیثیت میں مرنا چاہتے ہیں فرحت اللہ بابر نے واضح کیا ہے کہ تنویر زمانی کے پاس ملک یا بیرون ملک پیپلزپارٹی کا کوئی عہدہ نہیں۔