ماسکو(نیوزڈیسک)روسی میڈیا رپورٹ کے مطابق رواں سال سیلفی لینے کے شائقین کے ساتھ 100 سے زیادہ افسوسناک واقعات ہو چکے ہیں جن میں متعدد اپنی جانوں سے ہاتھ دھو بیٹھے جبکہ کئی افراد کے زخمی ہونے کی اطلاعات ہیں۔ روسی حکومت نے خطرناک حالات میں سیلفی لینے والے نوجوانوں کیلئے اب مہم شروع کی ہے۔ روسی میڈیا کے مطابق روس میں سیلفی بنانے کے رجحان میں روز بروز اضافہ ہو رہا ہے۔ نوجوانوں کی بڑی تعداد اس کا شکار نظر آتی ہے۔ اس لئے بہترین سیلفی لیتے ہوئے زخمی ہو جانا یا جان سے ہاتھ دھو بیٹھنا اب کوئی عام بات نہیں رہی۔

ماسکو کی ایک لڑکی پستول تھام کر اس کے ساتھ سیلفی بنا رہی تھی کہ اچانک گھوڑا دب جانے سے اس کے سر میں گولی لگی اور وہ شدید زخمی ہو گئی۔ ایک دوسری لڑکی کے مارے جانے کا واقعہ اس وجہ سے ہوا کہ وہ بداحتیاطی کے باعث پل سے نیچے جا گری تھی۔ رومانیہ کی اٹھارہ سالہ لڑکی میں ریل گاڑی کی چھت پر سیلفی لینے کی کوشش میں اپنی جان سے ہاتھ دھو بیٹھی۔ پانچ کم عمر لڑکے ریل گاڑی کی زد میں آ کر مرتے مرتے بچے جب وہ اکٹھے ہو کر ریلوے لائن پر سیلفی لے رہے تھے۔ یہ چند واقعات کا احوال ہے جبکہ بداحتیاطی کے باعث سیلفی لینے شوقین افراد میں سے 100 سے زائد اپنی جانوں سے ہاتھ دھو بیٹھے بلکہ شدید زخمی بھی ہوئے۔ خیال رہے کہ سیلفی ایسی خود پیکر تصویر کو کہاجاتا ہے جو ایک ڈیجیٹل کیمرے یا کیمرہ فون کے ذریعے کھینچی جاتی ہے۔

روسی وزارت داخلہ کی ’محفوظ سلیفی‘ مہم شروع کی گئی ہے جس کے تحت ایک وضاحتی کتابچہ بھی جاری کیا گیا ہے جس میں لوگوں کو خطرناک سیلفیوں کے خطرات سے متنبہ کیا گیا ہے۔ ان میں بجلی کے کھمبے یا ٹاوروں پر چڑھ کر سیلفی لینا، آتی ہوئی ٹرین کے سامنے تصویر لینا یا پھر کسی درندے کے ساتھ تصویر لینا وغیرہ شامل ہے۔ روسی پولیس سکولوں میں سیلفی لینے میں احتیاط برتنے کے متعلق پروگرام منعقد کرے گی۔