لاہور (نیوزڈیسک) انسداد دہشت گردی کی خصوصی عدالت نے سانحہ ماڈل ٹاﺅن کیس میں پاکستان عوامی تحریک کے رہنماﺅں اور پولیس اہلکاروں کو فرد جرم عائد کرنے کے لیے 14جولائی کو طلب کر لیا۔ لاہور کی انسداد دہشت گردی کی خصوصی عدالت اس ایف آئی آر پر فرد جرم عائد کرے گی جو حکومت کی جانب سے درج کرائی گئی تھی ۔ ایف آئی آر میں واقعے کا ذمہ دار پولیس اہلکاروں اور عوامی تحریک کے رہنما رحیق عباسی اور خرم نواز گنڈا پور کو ٹھہرا گیا تھا ۔ ایف آئی آر میں کہا گیا کہ عوامی تحریک کے کارکنوں کی جانب سے پولیس پر فائرنگ کی گئی جس کے بعد پولیس اہلکاروں نے بھی جوابی فائر کئے ۔ جس کے نتیجے میں عوامی تحریک کے کارکنان جاں بحق ہو گئے ۔ عدالت نے چالان جمع کرانے کے بعد تمام ملزمان پر چودہ جولائی کو فرد جرم عائد کرنے کا فیصلہ کیا ہے اورتمام ملزمان کو 14جولائی کو فردجرم عائد کرنے کے لیے طلب کر لیاگیا ہے۔