لندن(نیوزڈیسک)متحدہ قومی مومنٹ کے قائد الطاف حسین نے کہا ہے کہ پانی کے مسئلے کے حل کےلئے کالا باغ ڈیم کی تعمیر کے حوالے سے سندھ کے تحفظات دور کئے جائیں لندن سے جاری بیان میں الطاف حسین نے کہاکہ کراچی میں شدید گرمی کے باعث ہونے والی ہلاکتوں کے بعد سرد خانوں میں میتیں رکھنے کی جگہ بھی نہیں ہے۔ انہوںنے کہاکہ پانی کی عدم فراہمی نے قیامت برپا کر رکھی ہے، پانی کی فراہمی وفاقی اور صوبائی حکومت کی ذمہ داری ہے، پانی ذخیرہ کرنے کےلئے ملک بھر میں چھوٹے ڈیمز بنائے جائیں، پانی بحران کے پیش نظر کالا باغ ڈیم پر سندھ کے تحفظات دور کئے جائیں اور چاروں صوبوں کے ماہرین کا اجلاس بلایا جائے۔الطاف حسین نے مخیر حضرات سے اپیل کی کہ وہ آگے آئیں اور ہیٹ اسٹروک سے بچاﺅکیلئے قائم سینٹرز میں پانی کی بوتلیں، او آر ایس ، ضروری ادویات کی فراہمی اور سردخانوں کی تعمیر میں کردارادا کریں۔