کراچی (نیوز ڈیسک) متحدہ قومی موومنٹ کے رہنماءحیدر عباس رضوی نے پی ٹی آئی چیئرمین کے بیان کی شدید الفاظ میں مذمت کرتے ہوئے کہا ہے کہ عمران خان ایم کیو ایم کی لاش پر اپنا محل بنانا چاہتے ہیں۔
تفصیلات کے مطابق پریس کانفرنس سے خطاب کرتے ہوئے حیدر عباس رضوی کا کہنا تھا کہ عمران خان نے زیرو پر چھاپے کو کراچی کی آزادی قرار دیا، وہ احمقوں کی جنت میں رہتے ہیں اور کراچی کی سیاست میں اپنا راستہ بنانا چاہتے ہیں ، رینجرز کے افسران کو عمران خان کے بیانات کو سمجھنا چاہئے۔
ان کا کہنا تھا کہ عمران خان سے اپنے ایم این ایز سنبھالے نہیں جا رہے لیکن دوسروں پر الزامات لگا رہے ہیں، وہ ایم کیو ایم کی لاش پر اپنا محل بنانا چاہتے ہیں۔ حیدر عباس رضوی کا مزید کہنا تھا کہ پاکستان تحریک انصاف کراچی میں امن نہیں چاہتی جبکہ عمران خان احمقوں کی جنت میں رہتے ہیں، زہرہ شاہد کے قتل کا الزام لگانے والے ان کی بیٹی کا بیان پڑھ لیں ۔
